بہن بیٹیوں کے لئے اتر پردیش غیر محفوظ ہو گیا

لکھنؤ: مئی .سماج وادی پارٹی کے قومی صدر اور سابق وزیر اعلی اکھلیش یادو نے کہا ہے کہ اتر پردیش کی بی جے پی حکومت نے امن و امان کو بلڈوز کر دیا ہے۔ اتر پردیش بہنوں اور بیٹیوں کے لیے سب سے زیادہ غیر محفوظ ریاست بن گئی ہے۔ اسکول، گھر، تھانے اور اب ہسپتال میں بھی ریپ ہونے لگا ہے۔ دوسری بار وزیر اعلیٰ کی قیادت میں بی جے پی حکومت نے اتر پردیش کو عصمت دری کی ریاست بنا دیا ہے۔ بی جے پی حکومت خواتین کے تئیں پوری طرح سے بے حس ثابت ہوئی ہے۔اشتہارات میں امن و امان کا جھوٹا پرچار کر کے وزیر اعلیٰ اب عوام کو گمراہ نہیں کر سکیں گے۔ خود وزیر اعلیٰ کے ضلع گورکھپور کے کینٹ علاقہ میں ایک خاتون کی چین کھلے عام لوٹی گئی۔ ایک گھنٹے بعد کوتوالی میں انہی بدمعاشوں نے موبائل چھین لیا، ملزم فرار ہے۔کانپور میں پولیس نے بغیر ایف آئی آر کے ماں بیٹی کو اٹھایا اور تفتیش کے بہانے رات کو تھانے میں تشدد کا نشانہ بنایا جس سے پریشان خاتون نے خودکشی کرلی۔ للت پور معاملے میں پولس کو جلد ہی ملزم نہیں ملا اور تھانے میں متاثرہ لڑکی کی عصمت دری کر کے پورے ملک میں یوپی کو بدنام کر دیا۔ للت پور واقعہ کی سیاہی ابھی خشک بھی نہیں ہوئی تھی کہ علی گڑھ میں ایک پولیس کانسٹیبل نے نابالغ کی عصمت دری کر دی۔راجدھانی لکھنؤ میں سروجنی نگر تھانہ علاقہ میں 10 سالہ بچی کی عصمت دری کی گئی۔ شراوستی میں عصمت دری کی مخالفت کرنے پر بدمعاشوں نے خاتون کی آنکھ پھوڑ دی۔ لکھیم پور میں یرغمال بنا کر معصوم لڑکی کی عصمت دری کا واقعہ پریشان کن ہے۔ مرزا پور میں حاملہ خاتون کو زیادتی کا نشانہ بنایا گیا۔سچ تو یہ ہے کہ بی جے پی کی ڈبل انجن والی حکومت میں جرائم کی رفتار دوگنی رفتار سے بڑھ رہی ہے۔ تھانے افراتفری کے مراکز بن چکے ہیں۔ ڈکیتی، قتل، اغوا اور عصمت دری کے معاملات میں اتر پردیش سب سے آگے ہے۔ بی جے پی حکومت نے ترقی کو ایک طرف رکھا ہے۔ وہ نفرت اور سماج کو تقسیم کرنے والی سرگرمیوں کو فروغ دینے میں مصروف ہے۔ وزیراعلیٰ کو جگہ جگہ تقریریں کرنے کا شوق ہے، وہ انتظامیہ کو کنٹرول کرنے میں ناکام ثابت ہوئے ہیں۔ بی جے پی حکومت فرضی مقدمات اور فرضی انکاؤنٹر میں ریکارڈ بنا رہی ہے۔ یہاں تک کہ نیشنل ہیومن رائٹس کمیشن نے حراست میں ہونے والی اموات سے متعلق تمام نوٹس جاری کر دیے ہیں۔ایسی حکومت سے اور کیا امید کی جا سکتی ہے جو ایم ایل سی الیکشن جیتنے، پنچایت الیکشن جیتنے کے لیے پولس کا استعمال کرے؟ جب پولیس کو سروس رول کے خلاف کام کرنے پر مجبور کیا جائے گا تو وہ اپنے جبر کو کیسے روک سکے گی؟ پولیس پر بڑھتے ہوئے سیاسی دباؤ کے باعث اب سنگین وارداتوں میں بھی پولیس کا رویہ سست روی کا شکار ہے۔ ظالم اب سزا سے نہیں ڈرتے۔