ماحولیات اور معیشت کے درمیان توازن کے ذریعہ ہی پائیدار ترقی ممکن: دھامی

دہرادون جون۔اتراکھنڈ کے وزیر اعلیٰ پشکر سنگھ دھامی نے کہا ہے کہ ریاست میں کئے جانے والے بہترین پریکٹسز کو ایک دستاویز کی شکل میں مرتب کیا جائے گا اور اسے ریاست کے یوم تاسیس پر جاری کیا جائے گا۔ ان بہترین پریکٹسز کو ریاستی حکومت کی سطح پر بھی نافذ کیا جائے گا۔ ایک مقامی ہوٹل میں منعقدہ ایک پروگرام میں وزیر اعلیٰ نے 27 افراد اور اداروں کو ایس ڈی جی گول کیپر ایوارڈ سے نوازا جنہوں نے پائیدار ترقی کے اہداف کے تحت مختلف شعبوں میں جدت اور قابل تعریف کام کیا۔ مسٹردھامی نے کہا کہ ترقی کے ہدف کو حاصل کرنے کے لیے سب کو ٹھوس کوششیں کرنی ہوں گی۔ خود کفیل ہندوستان – خود کفیل اتراکھنڈکا سپنا پورا کرنے کے لیے عوامی تعاون ضروری ہے۔ بہت سی تنظیمیں اور افراد سماجی، اقتصادی اور ماحولیاتی میدان میں بہتر کام کر رہے ہیں۔ یہ سبھی ریاست کی ترقی کے برانڈ ایمبیسڈر ہیں۔ اتراکھنڈ کو بہترین ریاست بنانے کے لیے ہم سب کو مل کر آگے بڑھنا ہے۔وزیر اعلیٰ نے کہا کہ اتراکھنڈ میں ماحولیات اور معیشت کے درمیان توازن قائم کرتے ہوئے کام کرنا ہے۔ ماحول اور ترقی دونوں اہم ہیں۔ سالوں کے دوران ریاست میں پائیدار ترقی کے ہدف کے لیے اچھا کام کیا گیا ہے۔ ایس ڈی جی انڈیکس کی درجہ بندی میں اتراکھنڈ دسویں سے چوتھے مقام پر چلا گیا ہے۔ اعزاز پانے والے افراد اور اداروں کو مبارکباد دیتے ہوئے انہوں نے امید ظاہر کی کہ اس سے دیگر افراد اور اداروں کو بھی حوصلہ ملے گا۔