نئی تعلیمی پالیسی قوم کی تعمیر میں مددگار ثابت ہوگی: دھامی

کاشی پور/نینی تال، اپریل۔ اتراکھنڈ کے وزیر اعلی پشکر سنگھ دھامی نے کہا کہ نئی تعلیمی پالیسی سے ملک کی تعلیم کو نئی جہت ملے گی۔ اس کے ساتھ تمام طبقات کے لوگوں کو تعلیم کے یکساں مواقع ملیں گے۔مسٹر دھامی نے کہا کہ نئی تعلیمی پالیسی ملازمت پر مبنی تعلیم فراہم کرے گی، تحقیق اور ترقی کو فروغ دے گی اور نوجوانوں کی ہنر مندی کو فروغ دے گی۔ اس سے قوم ترقی کرے گی۔مسٹر دھامی اتوار کو کاشی پور کے لٹل اسکالرس اسکول میں ایک پروگرام میں بول رہے تھے۔ انہوں نے یہ بھی کہا کہ اتراکھنڈ ملک کی پہلی ریاست ہے جس نے نئی تعلیمی پالیسی کو نافذ کیا ہے۔انہوں نے طلباء کو مخاطب کرتے ہوئے کہا کہ آپ ملک کا مستقبل ہیں، اتراکھنڈ اور ملک کو آگے لے جانے کی ذمہ داری آپ کے کندھوں پر ہے۔اسکول کی تعریف کرتے ہوئے مسٹر دھامی نے کہا کہ ایم یواین اور لٹل اسکالرس کی کوششوں سے نوجوان نسل کو ایسا پلیٹ فارم دستیاب ہوگا، جس کے ذریعے ہمارے نوجوان ترقی پسند خیالات کے ساتھ ہمارے ملک کو ترقی کی راہ پر لے جا سکیں گے۔قبل ازیں وزیر اعلیٰ نے شمع روشن کر کے پروگرام کا افتتاح کیا۔ انہوں نے کہا کہ 1983 میں آنجہانی میجر شیو ناتھ بھلا نے اس اسکول کی شکل میں جو پودا لگایا تھا آج برگد کی شکل اختیار کر چکا ہے۔انہوں نے طلباء سے خطاب کرتے ہوئے کہا کہ ہمیں بچپن میں جس طرح کی تعلیم اور ثقافت ملتی ہے اس سے نہ صرف خاندان بلکہ معاشرہ اور ملک بھی سنورتا ہے۔