سری لنکا اس سال اگست میں ایشیا کپ کی میزبانی کرے گا

کولمبو، مارچ۔ 2022 ایشیا کپ سری لنکا میں 27 اگست سے 11 ستمبر تک کھیلا جائے گا۔ ایشیا کپ کھیلنے والے مختلف ممالک کے درمیان ایک میٹنگ (اے جی ایم) ہوئی، جس میں اس مقابلے سے متعلق کچھ اہم فیصلے لیے گئے۔ قابل ذکر ہے کہ رواں سال آسٹریلیا میں ہونے والے ٹی ٹوئنٹی ورلڈ کپ کے پیش نظر ایشیا کپ کے تمام میچز ٹی ٹوئنٹی فارمیٹ میں کھیلے جائیں گے۔ایشیا کی پانچوں ٹیسٹ ٹیمیں اس ٹورنامنٹ کا حصہ ہوں گی جس میں ہندستان، پاکستان، افغانستان اور بنگلہ دیش کی ٹیمیں شامل ہیں۔ اس کے علاوہ ایک اور ٹیم بھی اس ٹورنامنٹ کا حصہ ہوگی جس کا فیصلہ 20 اگست سے شروع ہونے والے کوالیفائنگ ٹورنامنٹ کے بعد کیا جائے گا۔ایشیا کپ اکثر ایک سال ون ڈے اور ایک سال ٹی ٹوئنٹی فارمیٹ میں کھیلا جاتا ہے۔ کہنے کا مطلب یہ ہے کہ اگر اس سال ایشیا کپ ٹی ٹوئنٹی فارمیٹ کے ساتھ کھیلا جا رہا ہے تو اگلے سال یہ مقابلہ ون ڈے فارمیٹ میں کرایا جائے گا۔ یہ آخری بار 2018 میں منعقد کیا گیا تھا اور ہندوستانی ٹیم نے جیتا تھا۔ اس کے بعد کووڈ کے دوران مقابلہ کچھ وقت کے لیے ملتوی کر دیا گیا۔ 2020 میں ہونے والے ایشیا کپ کے ملتوی ہونے کے بعد پہلے اسے 2021 میں کرانے کا منصوبہ تھا لیکن پھر اسے 2022 تک ملتوی کر دیا گیا۔ پہلے یہ فیصلہ کیا گیا تھا کہ پاکستان 2022 میں اس مقابلے کی میزبانی کرے گا لیکن بعد میں یہ فیصلہ تبدیل کر دیا گیا۔ اب پاکستان 2023 میں ہونے والے ایشیا کپ کی میزبانی کرے گا۔ٹورنامنٹ میں چھٹی ٹیم متحدہ عرب امارات، کویت، سنگاپور اور ہانگ کانگ سے ہوگی، جو 2020 میں اے سی سی کے علاقائی ٹورنامنٹ میں پہلے یا دوسرے نمبر پر رہی تھی۔ایشیا کپ کا یہ 15 واں ایونٹ ہے جو 1984 میں شارجہ میں شروع ہوا تھا۔ دفاعی چیمپئن ہندستان ٹورنامنٹ کی سب سے کامیاب ٹیم ہے جس نے سات بار ٹورنامنٹ جیتا ہے۔ سری لنکا کی ٹیم پانچ مرتبہ یہ ٹورنامنٹ جیت چکی ہے۔اے جی ایم کے دوران متفقہ طور پر فیصلہ کیا گیا کہ بی سی سی آئی کے سیکریٹری جے شاہ 2024 تک مزید ایک سال کے لیے ایشین کرکٹ کونسل (اے سی سی) کے صدر کے طور پر برقرار رہیں گے۔ عمان کرکٹ بورڈ کے پنکج خیمزی کو اے سی سی کا چیئرمین اور ملائیشیا کرکٹ ایسوسی ایشن کے مہندا ویلی پورم کو ترقی پذیر کمیٹی کا چیئرمین نامزد کیا گیا ہے۔