رسل ، نارائن ، ہٹمیئر اور پال پہنچے متحدہ عرب امارات

ابوظبی ، کیریبین پریمیر لیگ (سی پی ایل) ختم ہونے کے بعد ویسٹ انڈیز کے کھلاڑیوں نے آئی پی ایل کے لئے متحدہ عرب امارات (یو اے ای ) کا سفر شروع کردیا ہے۔ آئی پی ایل کا 13 واں سیزن 19 ستمبر سے 10 نومبر تک متحدہ عرب امارات میں ہونا ہے۔ سی پی ایل کا اختتام 10 ستمبر کو ہوا۔
ممبئی انڈینز کے آل راؤنڈر کیرون پولارڈ ہفتے کے روز متحدہ عرب امارات پہنچے تھے اور کولکتہ نائٹ رائیڈرز (کے کے آر) کے آل راؤنڈر آندرے رسل اور ٹیم کے اسپن بولر سنیل نارائن ، دہلی کیپٹلز کے بولر کیمو پال اور بیٹسمین شمرون ہٹیمیر اتوار کے روز متحدہ عرب امارات پہنچے ۔ یہ پانچوں کھلاڑی سی پی ایل میں کھیلنے کی وجہ سے اب تک ٹیم میں شامل نہیں ہوسکے۔ لیکن سی پی ایل ختم ہونے کے بعد یہ ونڈیز کھلاڑی متحدہ عرب امارات پہنچ گئے۔ پولارڈ ، رسل ، نارائن ، ہٹیمیر اور پال کو ضابطے کے مطابق چھ دن قرنطین میں رہنا پڑے گا اور یہ کھلاڑی آئسولیشن کی مدت ختم ہونے کے بعد اپنی ٹیم میں شامل ہوجائیں گے۔
کے کے آر کے لئے یہ بھی راحت کی بات ہے کہ ٹیم کے دھماکہ خیز بلے باز انگلینڈ کے کپتان ایون مورگن ، آسٹریلیائی فاسٹ بولر پیٹ کمنس اور انگلینڈ کے بلے باز ٹام بینٹن آئی پی ایل میں ممبئی کے خلاف پہلے میچ سے قبل ٹیم میں شامل ہوں گے۔ ٹورنامنٹ میں کے کے آر کا پہلا میچ دفاعی چمپئن ممبئی کے خلاف 23 ستمبر کو ہوگا۔
انگلینڈ اور آسٹریلیا کے درمیان تین ون ڈے میچوں کی سیریز جاری ہے اور مورگن ، کمنس اور بینٹن فی الحال اس سیریز میں کھیل رہے ہیں۔ آئی پی ایل شروع ہونے سے پہلے کے کے آر کے رسل اور نارائن میں شامل ہونا ایک راحت کی بات ہے۔
رسل اور نارائن کے کے آر کے ایک اہم کھلاڑی ہیں۔ رسل نے گذشتہ سیزن میں 56.66 کی اوسط سے 510 رنز بنائے اور 11 وکٹیں لیں۔ رسل اب تک آئی پی ایل میں 64 میچ کھیل چکے ہیں جس میں انہوں نے 1400 رنز بنائے ہیں اور 55 وکٹیں حاصل کی ہیں۔
نارائن بولنگ کے ساتھ ساتھ کے کے آر کیلئے بلے بازی کے لئے بھی کارآمد ہیں اور کئی بار ٹیم نے انہیں اوپنر کی حیثیت سے کھلایا ہے۔ نارائن نے اب تک آئی پی ایل میں 110 میچ کھیلے ہیں جس میں انہوں نے 771 رنز بنائے ہیں اور 122 وکٹیں حاصل کیں۔