شاہ سلمان اور ولی عہد کے ساتھ مثبت اور تعمیری بات چیت ہوئی: بائیڈن

جدہ،جولائی۔امریکی صدر جو بائیڈن نے سعودی عرب کے دورے کے دوران جدہ میں شاہ سلمان بن عبدالعزیز اور ولی عہد شہزادہ محمد بن سلمان بن عبدالعزیز سے ملاقات کے بعد کہا ہے کہ ان کی سعودی قیادت کے ساتھ ملاقات مثبت اور تعمری رہی ہے۔امریکی صدر آج ہفتے کو جدہ میں ایک اہم علاقائی کانفرنس سے بھی خطاب کریں گے۔ کانفرنس میں خلیجی ممالک کے علاوہ اردن، مصر اور عراق کے رہ نما شرکت کررہے ہیں۔بائیڈن نے یمن میں جنگ بندی کی حمایت میں مملکت کے کردار کی تعریف کرتے ہوئے کہا کہ سعودی عرب نے یمن میں اقوام متحدہ کے زیر اہتمام جنگ بندی کے استحکام اور حمایت میں کردار ادا کیا۔ان کا مزید کہنا تھا کہ میں نے سعودی قیادت کے ساتھ جنگ بندی کو مزید گہرا کرنے اور توسیع دینے پر اتفاق کیا۔امریکی صدر نے زور دے کر کہا کہ انہوں نے سعودی قیادت سے خطے میں ایران اور اس کے پراکسیوں کے خطرات کا مقابلہ کرنے کے لیے سعودی عرب کی سلامتی اور عسکری ضروریات پر تبادلہ خیال کیا۔بائیڈن نیکہا کہ امریکی افواج سمیت بین الاقوامی امن دستے بحیرہ احمر میں واقع تیران جزیرہ کو چھوڑ دیں گے جہاں وہ 40 سال سے زائد عرصے سے موجود ہیں۔ یہ اقدام اس خطے کی سرمایہ کاری اور سیاحت کے لیے ترقی میں معاون ثابت ہوگا۔انہوں نے کہا کہ میں نے سعودی عرب کے ساتھ توانائی کے تحفظ پر تبادلہ خیال کیا ہے۔ ہم نے دنیا میں توانائی کی حفاظت اور عالمی اقتصادی ترقی کو سہارا دینے کے لیے مناسب سپلائی کے بارے میں بات چیت کی ہے اور یہ جلد شروع ہو جائے گا۔ میں سپلائی بڑھانے کے لیے ہر ممکن کوشش کرتا ہوں۔ میں توقع کرتا ہوں کہ ایسا ہی ہوگا۔انہوں نے مزید کہا کہ سعودی عرب گرین انرجی اور سولر انرجی کے ساتھ ساتھ توانائی کی منتقلی کے لییکاربن کے اخراج کو کم کرنے کے لیے کام کو مربوط کرے گا، اور امریکی کمپنیوں کو عالمی معیارات کو اپنانے میں بھی مدد دے گا۔اسی تناظر میں بائیڈن نے عراق میں بجلی کے نیٹ ورک کو سعودی عرب اور کویت کے ذریعے تعاون کونسل کے نیٹ ورک سے منسلک کرنے کے لیے ایک معاہدے کا انکشاف کیا۔انہوں نے واشنگٹن اور ریاض کے درمیان 5G انٹرنیٹ ٹیکنالوجی کے حوالے سے شراکت داری کے معاہدے کا بھی اعلان کیا۔ اسی تناظر میں بائیڈن نے کہا کہ واشنگٹن روس اور چین کے لیے مشرق وسطیٰ میں خلا نہیں چھوڑے گا۔ایک اور تناظر میں، بائیڈن نے کہا کہ سعودی ولی عہد جمال خاشقجی کے قتل کے ذمہ داروں کے خلاف پہلے ہی اقدامات کر چکے ہیں۔

 

Related Articles