پٹرول اور ڈیزل کی قیمتوں میں زبردست کمی

نئی دہلی،  مئی .ملک میں پٹرول اور ڈیزل کی قیمتوں میں استحکام کے 45ویں دن کے بعد اتوار کو بڑی گراوٹ درج کی گئی۔آئل مارکیٹنگ کمپنیوں نے یہ فیصلہ مرکزی حکومت کی جانب سے پٹرول اور ڈیزل پر بالترتیب 8 روپے اور 6 روپے کی ایکسائز ڈیوٹی کم کرنے کے بعد کیا۔ایکسائز ڈیوٹی میں کمی کے بعد آج دارالحکومت دہلی میں پٹرول کی قیمت میں 8.69 روپے اور ڈیزل کی قیمت میں 7.05 روپے کی کمی دیکھی گئی۔انڈین آئل کے نوٹیفکیشن کے مطابق دہلی میں پٹرول کی قیمت 96.72 روپے اور ڈیزل کی قیمت 89.62 روپے فی لیٹر ہو گئی ہے، جب کہ ممبئی میں پٹرول کی قیمت 111.35 روپے فی لیٹر اور ڈیزل کی 97.28 روپے فی لیٹر پر آ گئی ہے۔ملک کے عام لوگوں کو بڑی راحت دیتے ہوئے وزیر خزانہ نرملا سیتا رمن نے ہفتہ کو ایکسائز ڈیوٹی میں کمی کا اعلان کیا تھا۔ انہوں نے کہا تھا کہ ایکسائز ڈیوٹی میں اس کمی سے پیٹرول اور ڈیزل کی قیمتوں میں بالترتیب 9.5 روپے اور 7 روپے کی کمی ہوگی۔بین الاقوامی مارکیٹ میں خام تیل کی قیمت اس دوران 110 ڈالر فی بیرل سے اوپر چل رہی ہے۔ لندن برینٹ کروڈ 112.55 ڈالر فی بیرل اور یو ایس کروڈ 0.42 فیصد بڑھ کر 110.35 ڈالر فی بیرل ہے۔ملک میں پٹرول اور ڈیزل کی قیمتوں میں 137 دن کے استحکام کے بعد گزشتہ 22 مارچ سے اضافہ ہونا شروع ہوا۔ جس کی وجہ سے پٹرول اور ڈیزل کی قیمتوں میں 14 باراضافہ کیا گیا۔ اس دوران ان کی قیمتوں میں تقریباً 10 روپے فی لیٹر اضافہ ہوا تھا۔قابل ذکر ہے کہ اس سے قبل مرکزی حکومت نے 3 نومبر 2021 کو پٹرول پر 10 روپے فی لیٹر اور ڈیزل پر 5 روپے فی لیٹر کی ایکسائز ڈیوٹی میں کمی کی تھی۔پٹرول اور ڈیزل کی قیمتوں کا روزانہ جائزہ لیا جاتا ہے۔