لندن ، پاکستان کے خلاف ٹی ٹوئنٹی سیریز میں آرام کی غرض سے نہ کھیلنے والے فاسٹ بالر جوفرا آرچر اور وکٹ کیپر بلے باز جوز بٹلر کی آسٹریلیا کے خلاف آئندہ تین ٹی ٹوئنٹی میچوں کی سیریز کے لئے انگلینڈ کے اسکواڈ میں واپسی ہوئی ہے۔ جو روٹ کو ٹی ٹوئنٹی اسکواڈ میں شامل نہیں کیا گیا ہے جبکہ وہ آسٹریلیا کے خلاف تین ون ڈے میچوں میں ٹیم کا حصہ ہوں گے۔
مارک ووڈ اور سیم کیرن کو بھی ٹی ٹوئنٹی اور ون ڈے دونوں ٹیموں میں شامل کیا گیا ہے جبکہ کرس ووکس 50 اوور کی ٹیم میں جگہ بنانے میں کامیاب رہے ہیں۔ ثاقب محمود جو پاکستان کے خلاف ٹی ٹوئنٹی سیریز کے لئے اسکواڈ کا حصہ ہیں کو بھی آسٹریلیا کے خلاف اسکواڈ میں شامل کیا گیا ہے۔
آسٹریلیا کے خلاف ٹی ٹوئنٹی اسکواڈ کے ریزرو کھلاڑیوں میں لیام لیونگ اسٹون اور ثاقب محمود ہیں انگلینڈ کے ون ڈے اور ٹی 20ٹیموں کی قیادت ایون مورگن کریں گے۔ انگلینڈ ٹیم کے قومی سلیکٹر ایڈ اسمتھ نے کہا ہے کہ رواں موسم گرما میں آسٹریلیا کے خلاف دونوں سیریز انتہائی دلچسپ ہوں گی۔
انہوں نے کہا کہ ہم نے دونوں سیریز کے لئے مضبوط اسکواڈز کا انتخاب کیا ہے۔ ہم آئندہ ٹی ٹوئنٹی ورلڈ کپ کی تیاریوں کے لئے بھی کام جاری رکھے ہوئے ہیں۔ یاد رہے کہ انگلینڈ اور آسٹریلیا کی ٹیموں کے درمیان تین ٹی 20 میچوں کی سیریز کا پہلا میچ 4 ، دوسرا 6 اور تیسرا و آخری ٹی ٹوئنٹی میچ 8 ستمبر کو دی ایزاس باؤل میں کھیلا جائے گا جبکہ تین ون ڈے میچوں کی سیریز کا پہلامیچ 11، دوسرا 13 اور تیسرا اور آخری ون ڈے میچ 16 ستمبر کو مانچسٹر میں کھیلا جائے گا۔ ون ڈے سیریز کے تینوں میچ اولڈ ٹریفورڈ، مانچسڑ میں کھیلے جائیں گے۔
ویسٹ انڈیز اور پاکستان کے خلاف ٹیسٹ سیریز ہونے کی وجہ سے جو روٹ ، جوفرا آرچر جیسے کھلاڑیوں کو آئرلینڈ اور پاکستان کے خلاف ٹی ٹونٹی سیریز سے آرام دیا گیا تھا۔ لیکن اب انگلینڈ کو آسٹریلیا کے خلاف کوئی ٹیسٹ میچ نہیں کھیلنا ہے ، ایسی صورتحال میں یہ کھلاڑی ایک بار پھر محدود اوورز کی ٹیم میں واپس آئے ہیں۔
جیسن رائے ہیمسٹرنگ کی وجہ سے ٹی 20 سیریز نہیں کھیل سکیں گے لیکن وہ ٹیم کے ساتھ ہی رہیں گے۔ اگر وہ ون ڈے سیریز تک فٹ ہیں تو وہ ون ڈے سیریز میں واپس آسکتے ہیں۔
انگلینڈ ٹی 20 ٹیم:
ایون مورگن (کپتان) ، معین علی ، جوفرا آرچر ، جونی بیئرسٹو ، ٹام بنٹن ، سیم بلنگز ، جوز بٹلر ، سیم کیرن ، ٹام کیرن ، جو ڈینلی ، کرس جورڈن ، ڈیوڈ ملان ، عادل راشد ، مارک ووڈ۔
انگلینڈ کی ون ڈے ٹیم:
ایون مورگن (کپتان) ، معین علی ، جوفرا آرچر ، جوناتھن بیئرسٹو ، ٹام بنٹن ، سیم بلنگز ، جوز بٹلر ، سیم کیرن ، ٹام کیرن ، عادل راشد ، جو روٹ ، کرس ووکس ، مارک ووڈ۔