مدھیہ پردیش کابینہ نے یو سی سی سمیت نو بلوں کو دی منظوری

مدھیہ پردیش کابینہ نے یو سی سی سمیت نو بلوں کو دی منظوری
73 طبی اداروں کو اپ گریڈ کرنے کا بھی فیصلہ
بھوپال، 19 جولائی مدھیہ پردیش کابینہ نے وزیر اعلیٰ ڈاکٹر موہن یادو کی صدارت میں اتوار کے روز گونڈ خاندان کے تاریخی جگدیش پور قلعے میں واقع چمن محل میں منعقدہ اجلاس میں "مدھیہ پردیش یکساں سول کوڈ (یو سی سی)، 2026” سمیت نو اہم بلوں کو آئندہ اسمبلی سیشن میں پیش کرنے کی منظوری دے دی۔ کابینہ نے ریاست کے 73 طبی اداروں (ہیلتھ سینٹرز) کو اپ گریڈ کرنے کی بھی منظوری دی اور اس پر 776 کروڑ 13 لاکھ روپے کے اخراجات کی منظوری دی۔
اجلاس میں "مدھیہ پردیش یکساں سول کوڈ، 2026” بل کو منظوری دیتے ہوئے ضروری آئینی اور ضابطے کی کارروائیوں کو پورا کر کے اسے اسمبلی میں پیش کرنے کے لیے محکمہ قانون و قانون سازی کو اختیار دیا گیا۔ کابینہ نے "مدھیہ پردیش ریپیل بل، 2026″، "مدھیہ پردیش فائر بریگیڈ اور ہنگامی خدمات بل, 2026″، "مدھیہ پردیش ہائی وے (ترمیمی) بل، 2026″، "مدھیہ پردیش پرائیویٹ یونیورسٹی ترمیمی بل، 2026″، "مدھیہ پردیش میڈیکل سائنسز یونیورسٹی (ترمیمی) بل، 2026″، "مدھیہ پردیش دھنونتری ہیلتھ یونیورسٹی بل، 2026″، "مدھیہ پردیش کوڈ آن ایمپاورنگ ورک اسپیسز، 2026 ” اور "مدھیہ پردیش ایز آف ڈوئنگ بزنس بل، 2026” کو بھی منظوری دی۔ متعلقہ محکموں کو ان بلوں کو اسمبلی میں پیش کرنے اور ضروری قانونی کارروائی کرنے کا مجاز بنایا گیا۔
کابینہ نے ریاست کے شہریوں کو بہتر اور آسان طبی سہولیات فراہم کرنے کے مقصد سے 73 طبی اداروں کو اپ گریڈ کرنے کا فیصلہ بھی کیا۔ اس کے تحت 29 سب ہیلتھ سینٹرز کو چھ بستروں والے پرائمری ہیلتھ سینٹرز، 19 پرائمری ہیلتھ سینٹرز کو کمیونٹی ہیلتھ سینٹرز، 18 کمیونٹی ہیلتھ سینٹرز کو 50 بستروں والے سول ہسپتالوں اور سات اداروں کو 100 بستروں والے ہسپتالوں کے طور پر تیار کیا جائے گا۔ اس فیصلے کے تحت 1600 مستقل اور 71 کنٹریکٹ عہدوں کی تخلیق کے علاوہ آؤٹ سورسنگ کے ذریعے 560 ملازمین کی تقرری کی بھی منظوری دی گئی۔ اس کے لیے سالانہ 122 کروڑ 83 لاکھ روپے کے ریونیو اخراجات کو بھی تسلیم کیا گیا۔ حکومت کے مطابق طبی اداروں کو اپ گریڈ کرنے سے ریاست کے مختلف علاقوں میں عام شہریوں کو مقامی سطح پر معیاری طبی سہولیات دستیاب ہو سکیں گی۔