سعودی عرب میں امریکی سفارتخانے نے اپنے ملازمین کیلئے سیکورٹی الرٹ جاری کیا

ریاض، سعودی عرب میں موجودہ سکیورٹی صورتحال کے پیش نظر امریکی سفارتخانے نے طائف اور ینبع کا سفر کرنے والے اپنے سرکاری ملازمین کے لیے سکیورٹی الرٹ جاری کیا ہے۔ سفارتخانے نے کہا ہے کہ ان دونوں شہروں کا سفر کرنے والے امریکی سرکاری ملازمین کو اب خصوصی اجازت حاصل کرنا ہوگی۔امریکی سفارتخانے نے اپنے سکیورٹی الرٹ میں اس اقدام کی وجہ سعودی عرب میں جاری موجودہ سکیورٹی صورتحال کو قرار دیا ہے۔ تاہم، الرٹ میں طائف اور ینبع کے حوالے سے کسی مخصوص خطرے یا ممکنہ حملے کی تفصیلی معلومات فراہم نہیں کی گئی ہیں۔
دراصل، ہفتے کے روز یمن کے حوثی باغیوں نے ریاض کے مرکزی ہوائی اڈے کے اطراف میزائل حملہ کیا تھا۔ سعودی قیادت والے اتحاد کے مطابق، اس کے فضائی دفاعی نظام نے حوثیوں کی جانب سے داغے گئے میزائل کو راستے میں ہی روک دیا۔امریکی سفارتخانے کی جانب سے جاری یہ انتباہ اسی حملے کے بعد سعودی عرب میں سکیورٹی صورتحال کے پیش نظر جاری کیا گیا ہے۔