صحت مراکز اور نل جل اسکیموں کی زمینی سطح پر جانچ شروع

بھاگلپور، ۔ بہار کے بھاگلپور ضلع میں صحت مراکز اور نل جل اسکیموں کی زمینی حقیقت کی جانچ کے لیے ضلع انتظامیہ نے کارروائی شروع کردی ہے۔ عام لوگوں کو بہتر طبی سہولیات اور صاف پینے کا پانی فراہم کرنے کے مقصد سے ضلع دیہی ترقیاتی ایجنسی (ڈی آر ڈی اے)، بھاگلپور نے متعلقہ افسران کو تفصیلی جانچ اور معائنہ کرنے کی ہدایت دی ہے۔ اس ہدایت کے تحت جانچ افسران کو اپنی مختص پنچایتوں میں واقع صحت مراکز اور نل جل اسکیموں کا موقع پر معائنہ کرکے ان کی موجودہ صورت حال کا جائزہ لینے کو کہا گیا ہے۔

صحت مراکز میں دستیاب سہولیات اور خدمات کے ساتھ نل جل اسکیموں کے فعال ہونے یا نہ ہونے کی بھی باریک بینی سے جانچ کی جائے گی۔ اس کے بعد حقیقی صورت حال پر مبنی رپورٹ تیار کی جائے گی۔ حکم کے مطابق افسران کو 28 اور 29 اکتوبر 2026 تک معائنہ مکمل کرنا تھا، جبکہ جانچ رپورٹ 30 اکتوبر تک متعلقہ بلاک ڈیولپمنٹ افسر (بی ڈی او) کے ذریعے ضلع دیہی ترقیاتی ایجنسی کو سونپنے کی ہدایت دی گئی ہے۔ معائنہ کے کام میں متعلقہ پنچایتوں کے پنچایت تکنیکی معاونین کو بھی شامل کیا گیا ہے۔

تمام بی ڈی او کو ہدایت دی گئی ہے کہ وہ اپنے اپنے بلاک میں ہونے والے معائنے کی مجموعی رپورٹ مقررہ مدت کے اندر ڈی آر ڈی اے کو فراہم کریں۔ اس کے علاوہ تمام بلاکوں کے سینئر انچارج افسران کو معائنہ کے پورے عمل کی نگرانی اور وقت پر رپورٹ پیش کرنے کی ذمہ داری سونپی گئی ہے۔ ضلع انتظامیہ کی اس پہل کا مقصد صحت خدمات اور پینے کے پانی کی اسکیموں کی حقیقی صورت حال کا پتہ لگاکر ضروری اصلاحی اقدامات کرنا ہے، تاکہ سرکاری اسکیموں کا فائدہ عام لوگوں تک بہتر انداز میں پہنچ سکے۔