پنجاب میں ہاکی کی وراثت کی گواہ بنے گی ایشیائی چیمپئنز ٹرافی،

نئی دہلی، ۔ مردوں کی ہیرو ایشیائی چیمپئنز ٹرافی 2026 کے انعقاد کے ساتھ پنجاب میں بین الاقوامی ہاکی کی واپسی ہونے جا رہی ہے۔ ہندوستانی ہاکی کو کئی عظیم کھلاڑی دینے والی اس ریاست میں 27 اکتوبر سے 2 نومبر تک ایشیا کی چھ سرکردہ ٹیمیں خطاب کے لیے مقابلہ کریں گی۔ ہندوستانی کپتان ہرمن پریت سنگھ نے اسے اپنے اور پوری ٹیم کے لیے ایک خاص موقع قرار دیا ہے۔ہندوستان میں مردوں کی ایشیائی چیمپئنز ٹرافی کا انعقاد دوسری مرتبہ ہو رہا ہے۔ اس سے پہلے 2023 میں چنئی نے اس مقابلے کی میزبانی کی تھی۔ اس مرتبہ پنجاب کے جالندھر اور موہالی میں میچ کھیلے جائیں گے۔ میزبان ہندوستان کے علاوہ ملائیشیا، جنوبی کوریا، چین، جاپان اور بنگلہ دیش کی ٹیمیں خطاب کے لیے میدان میں اتریں گی۔
پنجاب میں ہاکی محض ایک کھیل نہیں، بلکہ فخر اور ثقافتی شناخت کا حصہ ہے۔ گاؤں، اکیڈمیوں اور مقامی کھیلوں کے بنیادی ڈھانچے سے ابھرنے والے کھلاڑیوں نے بین الاقوامی سطح پر ملک کا نام روشن کیا ہے۔ اودھم سنگھ اور بل بیر سنگھ سینئر جیسے عظیم کھلاڑیوں سے لے کر موجودہ نسل کے من پریت سنگھ اور ہرمن پریت سنگھ تک، پنجاب نے ہندوستانی ہاکی کو کئی اہم کھلاڑی دیے ہیں۔
ریاست کی کھیلوں کی ثقافت، بنیادی سطح پر دستیاب سہولتوں اور ہاکی کے تئیں لوگوں کے جنون نے اولمپک تمغہ جیتنے والوں، عالمی کپ فاتحین اور قومی ٹیم کے کئی عظیم کھلاڑیوں کو تیار کرنے میں اہم کردار ادا کیا ہے۔ یہ مقابلہ پنجاب کی اسی وراثت کا جشن منانے کے ساتھ شائقین کو اعلیٰ سطح کی ہاکی قریب سے دیکھنے کاموقع بھی فراہم کرے گا۔
ہندوستانی کپتان ہرمن پریت سنگھ نے کہا، ’’یہ پوری ٹیم کے لیے، خاص طور پر پنجاب سے تعلق رکھنے والے کھلاڑیوں کے لیے ایک خاص موقع ہوگا، کیونکہ پہلی مرتبہ ہم پنجاب میں کسی بین الاقوامی ٹورنامنٹ میں ہندوستانی جرسی پہن کر کھیلیں گے۔‘‘انہوں نے کہا، ’’میرا پورا خاندان اسٹیڈیم میں بیٹھ کر مجھے بین الاقوامی میچ کھیلتے ہوئے دیکھنے کے لیے آنے والا ہے۔ اس میں میرے والد بھی شامل ہیں، جنہوں نے اب تک مجھے اسٹیڈیم میں بیٹھ کر ملک کے لیے کھیلتے ہوئے نہیں دیکھا ہے۔‘‘ہرمن پریت مسلسل دو ایشیائی کھیلوں میں ہندوستان کو سونے کا تمغہ دلانے والی ٹیم کی قیادت کرنے والے پہلے ہندوستانی کپتان ہیں۔ ایسے میں پنجاب میں گھریلو شائقین کے سامنے کھیلنا ان کے لیے ذاتی طور پر بھی ایک یادگار موقع ہوگا۔جالندھر کا ہاکی سے تاریخی تعلق رہا ہے۔ شہر کے آس پاس کے سنسرپور اور مٹھاپور جیسے گاؤں نے کئی نسلوں کے کھلاڑی تیار کیے ہیں۔ جالندھر کے برلٹن پارک میں واقع اولمپین سرجیت سنگھ ہاکی اسٹیڈیم میں 27 اکتوبر سے 2 نومبر تک افتتاحی تقریب اور لیگ مرحلے کے میچ کھیلے جائیں گے۔ اس اسٹیڈیم کا نام 1975 کے عالمی کپ کے فاتح اور عظیم محافظ سرجیت سنگھ کے نام پر رکھا گیا ہے۔اس کے بعد مقابلہ موہالی کے اولمپین بل بیر سنگھ سینئر بین الاقوامی ہاکی اسٹیڈیم میں منتقل ہوگا، جہاں 4 اور 5 نومبر کو سیمی فائنل اور تمغوں کے لیے مقابلے کھیلے جائیں گے۔
مقابلے میں تمام چھ ٹیمیں ایک دوسرے کے خلاف ایک ایک میچ کھیلیں گی۔ لیگ مرحلے کے بعد سرفہرست چار ٹیمیں سیمی فائنل میں پہنچیں گی۔ دفاعی چیمپئن ہندوستان اپنی مہم کا آغاز 27 اکتوبر کو جالندھر میں بنگلہ دیش کے خلاف کرے گا۔ہندوستان اس مقابلے کی سب سے کامیاب ٹیم ہے۔ وہ اب تک پانچ مرتبہ، 2011، 2016 اور 2018 میں مشترکہ فاتح کے طور پر، جبکہ 2023 اور 2024 میں خطاب جیت چکا ہے۔ گھریلو میدان پر کھیلنے سے ہندوستانی ٹیم کو جہاں پرجوش حامیوں کی حمایت ملے گی، وہیں دوسری ٹیموں کو پنجاب کی ہاکی روایت اور کھیلوں کی ثقافت کا تجربہ کرنے کا موقع بھی ملے گا۔