اے آئی، سیمی کنڈکٹر، سائبر سیکورٹی اور اہم معدنیات کے شعبوں میں ہندوستان اور پولینڈ کے درمیان شراکت داری بڑھانے پر زور

نئی دہلی، ۔ مرکزی وزیر مملکت برائے تجارت و صنعت جتن پرساد نے پولینڈ کی راجدھانی وارسا کا سرکاری دورہ کیا۔ اس دوران انہوں نے دونوں ممالک کے درمیان اقتصادی، تکنیکی اور اسٹریٹجک تعاون کو مضبوط بنانے کے لیے اعلیٰ سطحی ملاقاتیں کیں۔ ان مذاکرات میں مصنوعی ذہانت (اے آئی)، سیمی کنڈکٹر، سائبر سیکورٹی اور اہم معدنیات سمیت جدید ٹیکنالوجی کے شعبوں میں دوطرفہ تعاون بڑھانے کے امکانات پر تبادلہ خیال کیا گیا۔جتن پرساد نے 2 اور 3 نومبر کو اپنے دو روزہ دورہ پولینڈ کے دوران وارسا میں صنعت سے وابستہ اہم شخصیات اور کاروباری رہنماؤں سے ملاقاتیں کیں۔ ان ملاقاتوں میں دفاع، خلائی ٹیکنالوجی، انفارمیشن ٹیکنالوجی، مینوفیکچرنگ اور جدید الیکٹرانکس سمیت مختلف شعبوں میں ہندوستان اور پولینڈ کے درمیان تعاون کو فروغ دینے کے امکانات پر غور کیا گیا۔مرکزی وزیر نے مصنوعی ذہانت، سیمی کنڈکٹر اور اہم معدنیات کے شعبوں میں مشترکہ طور پر کام کرنے کے مواقع تلاش کرنے پر بھی زور دیا۔ انہوں نے ہندوستان اور پولینڈ کے درمیان تجارتی شراکت داری کو مزید مضبوط بنانے کی اپیل کرتے ہوئے ہندوستان اور یورپی یونین کے درمیان مجوزہ آزاد تجارتی معاہدے (ایف ٹی اے)کے تحت دستیاب مواقع کو بھی اجاگر کیا۔وزارت تجارت و صنعت کے مطابق جتن پرساد کے ساتھ 12 ہندوستانی کمپنیوں کے نمائندوں پر مشتمل ایک تجارتی وفد بھی پولینڈ گیا تھا۔ اس دورے کا بنیادی مقصد دونوں ممالک کے درمیان تجارت، سرمایہ کاری اور ٹیکنالوجی کے شعبوں میں شراکت داری کو وسعت دینا تھا۔دورے کے دوران جتن پرساد نے پولینڈ کے نائب وزیر اعظم اور وزیر برائے ڈیجیٹل امور کرسٹوف گاوکووسکی سے بھی ملاقات کی۔ اس ملاقات میں مصنوعی ذہانت، سیمی کنڈکٹر، ڈیٹا سینٹر اور سائبر سیکورٹی کے شعبوں میں باہمی تعاون بڑھانے کے امکانات پر تفصیلی گفتگو ہوئی۔مرکزی وزیر کے اس دورے کو ہندوستان اور پولینڈ کے درمیان اقتصادی تعلقات کو نئی بلندیوں تک پہنچانے اور جدید ٹیکنالوجی کے شعبوں میں مشترکہ سرمایہ کاری کے امکانات تلاش کرنے کی سمت ایک اہم قدم قرار دیا جارہا ہے۔