ترکیہ فن لینڈ اور سویڈن کی نیٹو میں شمولیت کی درخواستوں پر بات کرے گا

انقرہ،نومبر۔ترکیہ کے وزیر خارجہ مولود چاووش اوگلو نے کہا ہے کہ وہ آج منگل کو بخارسٹ میں نیٹو اتحاد کے اجلاس کے موقع پر اپنے سویڈش اور فن لینڈ کے ہم منصبوں سے نیٹو میں شمولیت کے لیے ان ممالک کی درخواستوں پر بات چیت کریں گے۔نجی ترک ٹی وی چینل ’این ٹی وی‘ نے چاووش اوگلو کے حوالے سے بتایا کہ ہم (منگل) کو بخارسٹ میں سویڈش اور فن لینڈ کے وزرائے خارجہ سے ملاقات کریں گے۔ یہ بات چیت سہ فریقی کوآرڈینیشن کے فریم ورک کے اندر ہو گی۔ ترکیہ نے نیٹو میں شامل ہونے کے امیدوار سویڈن اور فن لینڈ پر ’پی کے کے‘ اور اس کے اتحادیوں جیسے کرد پیپلز پروٹیکشن یونٹس کے ساتھ نرمی برتنے کا الزام لگایا ہے۔چاووش اوگلو نے کہا کہ ایکشن مثبت طور پر ترقی کر رہا ہے، لیکن ابھی بھی اقدامات کرنا باقی ہیں۔ ۔ انہوں نے مزید کہا کہ حقیقت میں سویڈن وہ ملک ہے جسے مزید اقدامات کرنے کی ضرورت ہے ۔سٹاک ہوم اور ہیلسنکی نے 24 فروری کو یوکرین کے خلاف روسی جنگ کے آغاز کے بعد نیٹو میں شامل ہونے کی خواہش کا اعلان کرتے ہوئے غیر جانبداری کی اپنی روایتی پالیسی کو ترک کر دیا تھا۔سویڈن کے نئے وزیر اعظم الف کرسٹرسن نے اس ماہ کے شروع میں ترک صدر رجب طیب ایردوآن سے ملاقات کے لیے انقرہ کا دورہ کیا تھا اور اسٹاک ہوم کو ترکیہ کی طرف سے نیٹو میں شمولیت کی حمایت کی امید تھی۔اس سفر سے پہلے نیٹو کے سیکرٹری جنرل جینز اسٹولٹن برگ جنہوں نے استنبول میں چاووش اوگلو اور ایردوآن سے ملاقات کی تھی کہا کہ دونوں ممالک انقرہ کے خدشات کو دور کرنے کے لیے ترکیہ کے ساتھ مل کر کام کرنے کے لیے پرعزم ہیں۔