اترپردیش کے سی ایم یوگی نے یوپی پویلین کا دورہ کیا

 دہلی۔اتر پردیش کے وزیر اعلی یوگی آدتیہ ناتھ نے بدھ کے روز یوپی کے دن دہلی کے پرگتی میدان میں منعقدہ ہندوستان تجارتی میلے میں یوپی پویلین کا دورہ کیا۔ اس دوران انہوں نے یہاں لگائے گئے یوپی کے تمام اضلاع کے اسٹالوں کا دورہ کیا اور کاریگروں اور دکانداروں سے ملاقات کی۔اس کے بعد وہاں موجود لوگوں سے خطاب کرتے ہوئے انہوں نے کہا کہ وزیر اعظم نریندر مودی نے کورونا کے دور میں ہم وطنوں کے سامنے خود انحصار ہندوستان کا ہدف دیا تھا۔ اس کے تحت انہوں نے ووکل فار لوکل کا نعرہ دیا۔ ،انہوں نے کہا، یوپی کی آبادی تقریباً 25 کروڑ ہے اور یہاں 75 اضلاع ہیں۔ ہر ضلع کی اپنی منفرد مصنوعات ہوتی ہے۔ اس کو فروغ دینے کے لیے، اسے مقامی سے عالمی بنانے کے لیے، ہم نے 2018 میں یوپی کے روایتی پروڈکٹ کو ون ڈسٹرکٹ ون پروڈکٹ کے طور پر برانڈ کیا تھا۔انہوں نے کہا کہ انڈونیشیا کے بالی میں منعقدہ G-20 اجلاس میں وزیر اعظم نریندر مودی ون ڈسٹرکٹ ون پروڈکٹ کے تحت تیار کردہ مصنوعات دنیا کے 20 ترقی یافتہ ممالک کے سربراہان کو تحفے میں دے رہے ہیں۔