اعظم گڑھ: موسیقار راجیش مشرا کے بیٹے کا سرعام گولی مار کر قتل

اعظم گڑھ،  ستمبر۔اتر پردیش کے اعظم گڑھ میں منگل کی دیر شام مشہور موسیقار راجیش مشرا کے گاؤں میں کچھ غنڈوں نے کھلے عام ان کے بیٹے کو گولی مار کر ہلاک کر دیا۔ فائرنگ سے ایک دیگر نوجوان زخمی ہوا ہے۔ اعظم گڑھ کے پولیس سپرنٹنڈنٹ انوراگ آریہ نے بتایا کہ ہریہر پور گاؤں میں راجیش مشرا کے 20 سالہ بیٹے آدرش مشرا کو دو مقامی نوجوانوں نے گھر کے نزدیک گولی مار کر ہلاک کر دیا۔ واقعہ کے بعد دونوں نوجوان فرار ہو گئے۔ آدرش کو تشویشناک حالت میں قریبی اسپتال لے جایا گیا، جہاں ڈاکٹروں نے اسے مردہ قرار دے دیا۔ اس فائرنگ میں ایک دیگر نوجوان زخمی ہوا ہے جس کا مقامی اسپتال میں علاج چل رہا ہے۔ اس واقعہ کے بعد مشتعل گاؤں والوں نے اسپتال کے باہر ہی چکہ جام کر دیا۔ اطلاع ملنے پر پولیس سپرنٹنڈنٹ انوراگ آریہ کے علاوہ بڑی تعداد میں پولیس موقع پر پہنچ گئی۔ پولیس معاملے کی تحقیقات کر رہی ہے۔آریہ نے کہا کہ ملزمان کی گرفتاری کے لیے چھا پے مارے جارہے ہیں۔ ان کا کہنا تھا کہ حملہ آوروں کی گرفتاری کے لیے چار ٹیمیں تشکیل دے دی گئی ہیں۔ ان کی گرفتاری کے بعد ان کے خلاف سخت کارروائی کی جائے گی۔ انہوں نے کہا کہ پولیس اہل خانہ کی شکایت کے بعد معاملہ درج کرے گی۔