’بِگ بی‘ کی دھماکا خیز فلم ’گڈ بائے‘ کا ٹریلر جاری

ممبئی،ستمبر۔فلم انڈسٹری کے ’’مقدر کا سکندر‘‘ امیتابھ بچن ایک بار پھر اپنی لازوال اداکاری سے فلم بینوں کا دل جیتنے آ رہے ہیں ان کی نئی فلم ’’گڈ بائے‘‘ کے ٹریلر نے ریلیز ہوتے ہی سوشل میڈیا پر دھوم مچادی۔ باپ بیٹی کا رشتہ سب سے انوکھا اور دل آویز ہے۔ بگ بی پہلے بھی فلم پیکو میں ایک ایسے عمر رسیدہ باپ کا کردار ادا کرچکے ہیں جو پیٹ کی بیماریوں کی وجہ سے نہ صرف خود پریشان رہتے ہیں بلکہ اپنی فرماں بردار بیٹی دیپیکا پڈوکون کے ناک میں دم کیے رکھتے ہیں۔ اس فلم میں امیتابھ بچن کی اداکاری کو خوب سراہا بھی گیا تھا۔پیکو کے بعد بگ بی ایک بار پھر باپ بیٹی کے رشتے پر مبنی ایک فیملی فلم میں جلوہ گر ہوں گے۔ پیکو کے برعکس ’’ گڈ بائے‘‘ میں باپ بیٹی کا رشتہ اتنا مضبوط نہیں ہوتا بلکہ اس میں پڑتی ڈراریں لمحہ لمحہ آپ کو فلم سے جوڑے رکھیں گی۔خاندان کے ٹوٹنے اور بکھرنے جیسے درد ناک موضوع کو وکاس بہل نے ہلکے پھلکے مزاحیہ انداز میں تحریر کیا ہے لیکن مکالمے کافی جاندار اور بولڈ ہیں۔ فلم کی ہدایت کاری بھی انہی کی ہے۔فلم میں امیتابھ بچن کی بیٹی کا کردار رشمیکا مندنا ادا کررہی ہیں جو بلاک بسٹر تیلگو فلم پشپا میں اپنی دھاک بٹھا چکی ہیں جب کہ فلم میں امیتابھ بچن کی بیوی کا کردار نینا گپتا نے ادا کیا ہے جن کا جلد ہی انتقال ہوجاتا ہے اور پھر باپ بیٹی میں کیا ہوتا ہے یہ آپ کو فلم دیکھنے پر پتہ چلے گا۔فلم گڈ بائے کی شوٹنگ رواں برس اپریل میں شروع ہوئی تھی اور 7 اکتوبر 2022 کو سینماؤں کی زینت بنے گی۔ فلم کو ایکتا کپور نے پروڈیوس کیا ہے۔

Related Articles