صدر جمہوریہ مرمو اوروزیر اعظم مودی کو بالیندر شاہ نیپال کے دو تاریخی مجسمے پیش کریں گے

کٹھمنڈو، نیپال کے وزیر اعظم بالیندر شاہ اپنے ہندوستان کے سرکاری دورے کے دوران ہندوستانی وزیر اعظم نریندر مودی اور صدر جمہوریہ دروپدی مرمو کو نیپال کے دو اہم مذہبی اور تاریخی ورثوں سے وابستہ مجسمے بطور تحفہ پیش کریں گے۔ اس سے قبل نیپال کے وزرائے اعظم ہندوستان کے دورے کے دوران پشوپتی ناتھ مندر کی نقل بطور تحفہ پیش کرتے رہے ہیں۔
وزیر اعظم شاہ آج دو روزہ سرکاری دورے پر نئی دہلی پہنچ رہے ہیں۔ پیر کے روز ان کی ہندوستانی وزیر اعظم نریندر مودی اور صدر جمہوریہ کے ساتھ الگ الگ ملاقات کا پروگرام ہے۔ شاہ ہندوستانی وزیر اعظم مودی کو راتُو مچھِندرناتھ کا مجسمہ پیش کریں گے۔ راتُو مچھِندرناتھ نیپال کی مذہبی، ثقافتی اور تاریخی شناخت سے وابستہ اہم دیوتا مانے جاتے ہیں۔نیپال کی روایتی روایات کے مطابق، لچھوی خاندان کے حکمراں نریندر دیو راتُو مچھِندرناتھ کو ہندوستان کے اس وقت کے کامروپ (موجودہ آسام) میں واقع کاماکھیا علاقے سے کٹھمنڈو وادی لے کر آئے تھے۔ مذہبی عقیدے کے مطابق، اس وقت وادی میں طویل عرصے تک بارش نہ ہونے کے سبب قحط جیسی صورت حال پیدا ہوگئی تھی۔ مچھِندرناتھ کو نیپال لانے کے بعد بارش شروع ہوئی تھی۔صدر جمہوریہ کو وزیر اعظم شاہ کٹھمنڈو کے چابہل میں واقع چارومتی وہار سے وابستہ ایک مجسمہ بطور تحفہ پیش کریں گے۔ چارومتی وہار کی تاریخ ہندوستان کے موریہ خاندان کے شہنشاہ اشوک اور ان کی بیٹی چارومتی سے وابستہ ہے۔ روایتی عقائد کے مطابق، شہنشاہ اشوک اپنی بیٹی چارومتی کے ساتھ کٹھمنڈو وادی آئے تھے۔ چارومتی نے مقامی شاہی خاندان کے شہزادے دیوپال سے شادی کی اور دیوپٹن علاقے میں رہنے لگیں۔ مانا جاتا ہے کہ انہوں نے اسی علاقے میں وہار تعمیر کروایا تھا۔ یہ بھی کہا جاتا ہے کہ ان کا انتقال اسی علاقے میں ہوا تھا۔نیپال کے ان دونوں تاریخی ورثوں سے وابستہ مجسمے بطور تحفہ پیش کرکے وزیر اعظم شاہ ہندوستان اور نیپال کے درمیان صدیوں پرانے مذہبی، ثقافتی اور تہذیبی تعلقات کو اجاگر کرنے کی کوشش کریں گے۔

Related Articles