جے کے ایس ایس بی امتحان میں مبینہ دھاندلی: میرواعظ کا احتساب اور دوبارہ امتحان یا منسوخی کا مطالبہ

سری نگر، ۔ میرواعظ کشمیر مولوی عمر فاروق نے کہا ہے کہ جموں و کشمیر سروسز سلیکشن بورڈ (جے کے ایس ایس بی) کے فائنانس اکاؤنٹس اسسٹنٹ (ایف اے اے) امتحان میں مبینہ دھاندلی سے نمٹنے کا حکام کا طریقہ طلبہ کو اس حد تک مایوس کر چکا ہے کہ وہ سڑکوں پر نکلنے پر مجبور ہو گئے ہیں۔ انہوں نے حکومت سے مطالبہ کیا کہ وہ ذمہ داری کا تعین کرے اور تحقیقات کے نتائج کی بنیاد پر امتحان دوبارہ لینے یا اسے منسوخ کرنے کا اعلان کرے۔سماجی رابطے کی ویب سائٹ ایکس پر ایک پوسٹ میں میرواعظ نے کہا کہ کشمیری طلبہ ان الزامات پر شدید احتجاج کر رہے ہیں، جو اس نوعیت کے پہلے الزامات نہیں ہیں۔ انہوں نے یاد دلایا کہ 2022 میں پولیس سب انسپکٹر (پی ایس آئی) اور ایف اے اے امتحانات اور 2025 میں جونیئر انجینئر (جے ای) الیکٹریکل امتحان میں بھی پرچہ لیک ہونے اور بدعنوانی کے ایسے ہی الزامات سامنے آئے تھے، لیکن ان معاملات میں کوئی تحقیقات نہیں ہوئی۔ان کے مطابق اس بار ملزم سہولت کاروں کی گرفتاری اور ان کے قبضے سے دستاویزات کی ضبطی ہی قصورواروں کے خلاف سخت کارروائی اور متاثرہ امیدواروں کو انصاف دلانے کے لیے کافی ثبوت ہونے چاہیے تھے۔ ان کا کہنا تھا کہ ’’تمام ثبوتوں کے باوجود‘‘ حکام نے جس طرح اس معاملے کو سنبھالا، اس نے طلبہ کو جواب اور جواب دہی مانگنے کے لیے سڑکوں پر آنے پر مجبور کر دیا ہے۔اسے ’’انتہائی سنگین معاملہ‘‘ قرار دیتے ہوئے میرواعظ نے سوال کیا کہ کیا نوجوانوں کے لیے بھرتی کا شفاف اور منصفانہ عمل یقینی بنانا حکومت کی ذمہ داری نہیں؟ یہ وہ نوجوان ہیں جو برسوں کی محنت اور والدین کی قربانیوں کے بعد ایک منصفانہ موقع کی امید لگائے بیٹھے ہیں۔ انہوں نے سوال اٹھائے کہ ’’اگر نظام ہی انہیں ناکام کر دے تو وہ کیا کریں؟‘‘ ان کا کہنا تھا کہ حکومت کم از کم اب یہ کر سکتی ہے کہ ذمہ داری کا تعین کرے، قصورواروں کے خلاف سخت کارروائی کرے اور مبینہ بے ضابطگیوں کی تحقیقات کے نتائج کی بنیاد پر دوبارہ امتحان یا منسوخی کا اعلان کرے۔ انہوں نے مزید کہا کہ بھرتی کے عمل کی ساکھ اور شفافیت کو برقرار رکھا جانا چاہیے تاکہ عوام کے مستقبل کا تحفظ ہو سکے۔واضح رہے کہ ایف اے اے امتحان محکمہ فائنانس کی 600 آسامیوں کے لیے 15 نومبر کو منعقد ہوا تھا، جس میں جموں و کشمیر بھر سے 1.60 لاکھ سے زائد امیدواروں نے شرکت کی۔ ایس ایس پی جموں جوگندر سنگھ کے مطابق جموں پولیس نے الیکٹرانک مواصلاتی آلات کے ذریعے مبینہ طور پر نقل میں مدد دینے کی کوشش کے الزام میں 14 افراد کو گرفتار کیا ہے، جبکہ 8 وائرلیس سیٹ، 22 موبائل فون اور 5 چار پہیہ گاڑیاں ضبط کی گئی ہیں۔ اس سلسلے میں تین ایف آئی آر درج کی گئی ہیں اور وسیع نیٹ ورک کی تحقیقات کے لیے خصوصی تحقیقاتی ٹیم (ایس آئی ٹی) تشکیل دی گئی ہے۔ امتحان دوبارہ لینے کے مطالبے کو لے کر امیدواروں نے جموں اور سری نگر میں احتجاج کیا۔اس سے قبل 2022 میں جموں و کشمیر انتظامیہ نے پرچہ لیک ہونے اور بدعنوانی کے الزامات کے بعد سب انسپکٹر، جونیئر انجینئر اور فائنانس اکاؤنٹس اسسٹنٹ کی آسامیوں کی منتخب فہرستیں منسوخ کر دی تھیں، جبکہ انفورسمنٹ ڈائریکٹوریٹ نے بعد میں سب انسپکٹر معاملے کے کلیدی ملزمان کو گرفتار کیا تھا۔

Related Articles

Check Also

Close