پونے میں چلتی الیکٹرک بس میںلگی آگ تمام 17 مسافر محفوظ

پونے ، ۔ مہاراشٹر کے پونے شہر میں پیر کی صبح ایک چلتی الیکٹرک بس میں اچانک آگ لگنے سے مسافروں میں خوف و ہراس پھیل گیا۔ سوارگیٹ علاقے میں اپولو اسپتال کے سامنے پیش آنے والے اس واقعے کے وقت بس میں 17 مسافر موجود تھے۔ تاہم ڈرائیور نے بروقت خطرہ محسوس کرتے ہوئے بس سڑک کے کنارے روک دی اور تمام مسافروں کو فوری طور پر باہر نکلنے کی ہدایت دی۔ ڈرائیور کی حاضر دماغی اور فوری کارروائی کے باعث تمام 17 مسافر بحفاظت بس سے اترنے میں کامیاب ہوگئے اور ایک بڑا حادثہ ٹل گیا۔ واقعے میں کسی کے ہلاک یا زخمی ہونے کی اطلاع نہیں ہے۔پولیس کے مطابق مہاراشٹر اسٹیٹ ٹرانسپورٹ کارپوریشن کی الیکٹرک بس سوارگیٹ کی جانب جارہی تھی۔ اسی دوران بس سے اچانک دھواں نکلنا شروع ہوا اور کچھ ہی دیر میں آگ کے شعلے بلند ہونے لگے۔ صورتحال کی سنگینی دیکھتے ہوئے ڈرائیور نے گاڑی فوراً سڑک کے کنارے کھڑی کردی۔ اس نے مسافروں کو بس سے باہر نکلنے کے لیے کہا، جس کے بعد تمام مسافر محفوظ مقام پر پہنچ گئے۔ بروقت بس روکنے اور مسافروں کو باہر نکالنے کی وجہ سے کسی کو نقصان نہیں پہنچا۔
واقعے کی اطلاع ملتے ہی فائر بریگیڈ اور پولیس کی ٹیمیں جائے وقوعہ پر پہنچ گئیں۔ مقامی شہریوں نے بھی امدادی کارروائیوں میں تعاون کیا۔ فائر بریگیڈ کے عملے نے آگ بجھانے کا کام شروع کیا اور کچھ دیر کی کوششوں کے بعد آگ پر قابو پالیا۔ اس دوران جائے وقوعہ پر لوگوں کی بھیڑ جمع ہوگئی تھی۔ پولیس نے بھیڑ کو قابو میں رکھنے اور سڑک پر ٹریفک کی آمدورفت معمول پر لانے کے لیے اقدامات کیے۔ابتدائی اندازے کے مطابق بس میں آگ لگنے کی ممکنہ وجہ شارٹ سرکٹ ہوسکتی ہے، تاہم اس کی ابھی تصدیق نہیں ہوئی ہے۔ پولیس آگ لگنے کے اصل اسباب معلوم کرنے کے لیے تحقیقات کررہی ہے۔ حتمی وجہ جانچ مکمل ہونے کے بعد ہی سامنے آسکے گی۔ اس واقعے میں ڈرائیور کی بروقت کارروائی تمام مسافروں کو محفوظ نکالنے میں اہم ثابت ہوئی۔