اداکارہ نصرت بھروچا کی ریڑھ کی ہڈی میں فریکچر، ٹیم نے دی اطلاع
ممبئی، اداکارہ نصرت بھروچا کے بارے میں تشویش ناک خبر سامنے آئی ہے۔ بالی میں شوٹنگ کے دوران پیش آنے والے ایک حادثے میں ان کی ریڑھ کی ہڈی میں فریکچر ہوگیا ہے۔ فی الحال اداکارہ بالی کے ایک اسپتال میں ڈاکٹروں کی نگرانی میں ہیں۔ ان کی ٹیم کی جانب سے جاری آفیشیل بیان کے مطابق ڈاکٹروں کی جانچ کے بعد نصرت کی ریڑھ کی ہڈی کی سرجری کی جائے گی۔ اس کے لیے انہیں ایئر ایمبولینس کے ذریعے بالی سے ممبئی لانے کی تیاریاں کی جا رہی ہیں۔
نصرت کی ٹیم نے بتایا کہ اس وقت اداکارہ کی صحت ان کی اولین ترجیح ہے اور انہیں ضروری طبی سہولیات فراہم کرنے پر پوری توجہ دی جا رہی ہے۔ ٹیم نے نصرت کے مداحوں اور خیر خواہوں کی تشویش اور نیک خواہشات کے لیے ان کا شکریہ ادا کیا ہے۔ ساتھ ہی سبھی سے اپیل کی گئی ہے کہ وہ اداکارہ کی نجی زندگی کا احترام کریں اور انہیں علاج اور صحت یابی پر توجہ دینے کا موقع دیں۔ مناسب وقت پر نصرت کی صحت سے متعلق مزید معلومات شیئر کی جائیں گی۔بتایا جا رہا ہے کہ چوٹ کی سنگینی اور مجوزہ سرجری کے پیش نظر نصرت کو مکمل صحت یابی کے لیے کچھ عرصہ آرام کرنا پڑ سکتا ہے۔ ایسے میں آنے والے چند ہفتوں کے دوران ان کے کام پر بھی اثر پڑنے کا امکان ہے۔ نصرت شوٹنگ کے سلسلے میں بالی گئی تھیں، جہاں سیٹ پر یہ حادثہ پیش آیا۔ فی الحال ان کا علاج جاری ہے اور مزید علاج کے لیے انہیں ممبئی لانے کی تیاریاں کی جا رہی ہیں۔
