شدید بارش سے جھارکھنڈ میں معمول کی بارش میں کمی کا فرق محض ایک فیصد رہ گیا

رانچی، جھارکھنڈ میں گزشتہ چار دن سے جاری شدید بارش کے سبب معمول سے کم بارش کا فرق محض ایک فیصد رہ گیا ہے۔ 23 ستمبر تک ریاست میں معمول سے آٹھ فیصد کم بارش ہوئی تھی جو اب مزید کم ہو کر ایک فیصد رہ گئی ہے۔ محکمہ موسمیات نے ہفتہ کو یہ اطلاع دی۔محکمے کے مطابق، یکم جون سے 26 ستمبر تک ریاست میں 991.3 ملی میٹر بارش درج کی گئی، جبکہ اس مدت میں معمول کی بارش 999.7 ملی میٹر ہے۔محکمہ موسمیات کے مطابق شدید ہوا کے کم دباؤ کا حلقہ ہفتہ کو شمال مشرقی مدھیہ پردیش اور اس سے متصل چھتیس گڑھ میں مرکوز ہے۔ اس کے اثر سے جھارکھنڈ میں دوپہر کے بعد بارش میں کمی آئی، تاہم دیر شام تک کئی علاقوں میں بارش ہونے کا امکان ہے۔گزشتہ 24 گھنٹوں کے دوران جمشیدپور میں سب سے زیادہ 119.8 ملی میٹر بارش درج کی گئی۔ رانچی میں 59.4 ملی میٹر بارش ہوئی۔ ہفتہ کو رانچی اور آس پاس کے علاقوں میں صبح سے وقفے وقفے سے بارش ہوتی رہی۔ بارش کے باعث بجلی کی آنکھ مچولی جاری رہی اور لوگوں کے روزمرہ کے کام کاج متاثر ہوئے۔
ہفتہ کو رانچی میں زیادہ سے زیادہ درجہ حرارت 23.9 اور کم سے کم 21.9 ڈگری سیلسیس رہا۔ جمشیدپور میں یہ 27.2 اور 25 ڈگری، ڈالٹن گنج میں 28.3 اور 24.6 ڈگری، بوکارو میں 27.5 اور 22.1 ڈگری جبکہ چائباسا میں 26.8 اور 22.2 ڈگری سیلسیس درج کیا گیا۔