قومی فلم ایوارڈز اب ملک کے اہم سیاحتی مقامات تک پہنچائے جائیں گے: اشونی ویشنو

ایکتا نگر،  مرکزی وزیر اطلاعات و نشریات اشونی ویشنو نے کہا ہے کہ حکومت قومی فلم ایوارڈز کو اب ملک کے اہم سیاحتی مقامات تک لے جانے کی پہل کر رہی ہے۔ اس اقدام کا مقصد فلمی صنعت اور سیاحت کو ایک دوسرے سے جوڑنا اور ملک کے مختلف سیاحتی مقامات کو عالمی سطح پر مزید نمایاں کرنا ہے۔
قومی فلم ایوارڈز کی تقریب میں شرکت کے لیے کیوڑیا ریلوے اسٹیشن پہنچنے کے بعد میڈیا سے گفتگو کرتے ہوئے اشونی ویشنو نے کہا کہ اس پہل کی شروعات ایکتا نگر سے کی جا رہی ہے۔ سردار ولبھ بھائی پٹیل کے مجسمے اور قدرتی خوبصورتی کے باعث ایکتا نگر ملک اور دنیا کے اہم سیاحتی مقامات میں اپنی شناخت بنا چکا ہے۔
انہوں نے کہا کہ قومی فلم ایوارڈز کی تقریب کے موقع پر صدرِ جمہوریہ، فلمی دنیا کی معروف شخصیات اور دیگر اہم افراد کی ایکتا نگر آمد سے اس سیاحتی مقام کو مزید وسیع شناخت حاصل ہوگی۔مرکزی وزیر نے کہا کہ حکومت کی کوشش ہے کہ قومی فلم ایوارڈز کو صرف کسی کانفرنس روم تک محدود رکھنے کے بجائے عام لوگوں اور حقیقی سیاحتی مقامات سے جوڑا جائے۔ انہوں نے تمام ریاستوں سے اپیل کی کہ وہ اپنے بہترین سیاحتی مقامات کے حوالے سے تجاویز پیش کریں۔اشونی ویشنو نے کہا کہ تجاویز میں بنیادی سہولتوں کی بہتری کے ساتھ ساتھ سیاحتی مقام کی ہمہ جہت ترقی کا منصوبہ بھی شامل ہونا چاہیے۔ جس ریاست کی تجویز منتخب ہوگی، وہاں کے سیاحتی مقام پر آئندہ قومی فلم ایوارڈز کی تقریب منعقد کی جائے گی۔انہوں نے کہا کہ وزیر اعظم نریندر مودی نے جی 20 کی میزبانی کو ملک کے مختلف حصوں اور ریاستوں تک پہنچایا تھا۔ اسی سوچ کے تحت قومی فلم ایوارڈز کو بھی ملک کے مختلف علاقوں میں منعقد کیا جا رہا ہے۔مرکزی وزیر کے مطابق اس اقدام سے فلم اور سیاحت کے درمیان تعلق مزید مضبوط ہوگا اور جن سیاحتی مقامات پر ایوارڈز کی تقریبات منعقد ہوں گی، انہیں بھی بڑے پیمانے پر فائدہ پہنچے گا۔