لیفٹیننٹ گورنر اور وزیر اعلیٰ نے 200 ای وی بسوں اور ’خواتین کے لئے مخصوص بس سروس‘ کو ہری جھنڈی دکھائی

نئی دہلی، 19 اگست دہلی کے لیفٹیننٹ گورنر ترنجیت سنگھ سندھو اور وزیر اعلیٰ ریکھا گپتا نے بدھ کو 200 نئی الیکٹرک بسوں، دہلی-کرنال بین ریاستی ای وی بس سروس اور ’خواتین کے لئے مخصوص بس سروس‘ کو ہری جھنڈی دکھائی۔ اس کے ساتھ ہی دہلی یونیورسٹی اسپورٹس کمپلیکس میں منعقد پروگرام کے دوران دہلی ٹرانسپورٹ کارپوریشن (ڈی ٹی سی) کے راج گھاٹ ڈپو-I میں ای وی چارجنگ اسٹیشن کا افتتاح بھی کیا گیا۔ یہ ای وی چارجنگ اسٹیشن تقریباً 5.50 کروڑ روپے کی لاگت سے تیار کیا گیا ہے۔ اس موقع پر دہلی کے وزیر ٹرانسپورٹ ڈاکٹر پنکج کمار سنگھ اور مقامی رکن اسمبلی سوریہ پرکاش کھتری بھی موجود تھے۔

لیفٹیننٹ گورنر نے کہا کہ وزیر اعظم نریندر مودی کی ’شکتی کی سپت دھارا‘ کی سوچ سے متاثر یہ اقدامات پائیدار نقل و حمل کو مضبوط بنانے کے ساتھ خواتین کو بااختیار بنانے اور ان کی حفاظت کو بھی فروغ دیتے ہیں۔ انہوں نے کہا کہ مکمل طور پر خواتین ملازمین کے ذریعے چلائی جانے والی ان ’لیڈیز اسپیشل بسوں‘ میں پینک بٹن بھی ہوں گے، جو براہ راست دہلی پولیس کی 112 پی سی آر سروس سے منسلک ہوں گے، تاکہ ہنگامی صورتحال میں فوری مدد فراہم کی جاسکے۔

لیفٹیننٹ گورنر نے کہا کہ ’آسان طرز زندگی ‘، پائیدار نقل و حمل اور ’وکست بھارت 2047‘ کی راہ پر ایک صاف ستھری، سرسبز اور محفوظ ترقی یافتہ دہلی کی جانب یہ ایک اہم قدم ہے۔

قابل ذکر ہے کہ 200 نئی ای وی بسوں کے ڈی ٹی سی کے بیڑے میں شامل ہونے کے بعد بسوں کی مجموعی تعداد تقریباً 6800 ہوگئی ہے، جس میں 4938 الیکٹرک بسیں اور 1750 سی این جی بسیں شامل ہیں۔ اس کے ساتھ ہی ڈی ٹی سی نے دہلی-کرنال روٹ پر پانچ مکمل طور پر الیکٹرک، ایئر کنڈیشنڈ بسیں بھی شروع کی ہیں۔ یہ بس سروس تقریباً 133 کلومیٹر طویل ون وے کوریڈور پر دونوں سمتوں میں روزانہ 10 ٹرپس کی سہولت فراہم کرے گی۔ یہ روٹ مہارانا پرتاپ آئی ایس بی ٹی کشمیری گیٹ کو براہ راست ہریانہ کے کرنال سے جوڑے گا، جس میں سنگھو بارڈر، رائے، بھال گڑھ، مرتھل، گنّور، سمالکھا، پانی پت، گھرونڈا اور مدھوبن سمیت کئی اہم مقامات شامل ہیں۔ یہ بسیں دہلی کو بڑوت، سونی پت، دھاروہیڑا، پانی پت اور روہتک سے بھی جوڑتی ہیں، جس سے زیرو ایمیشن پبلک ٹرانسپورٹ کا نیٹ ورک دارالحکومت دہلی کی حدود سے باہر تک پھیل رہا ہے۔

خواتین کی حفاظت، سہولت اور رسائی کو مزید بہتر بنانے کے لیے ڈی ٹی سی نے خواتین کے لیے خصوصی طور پر 56 الیکٹرک بس سروسز شروع کی ہیں۔ ان میں زیادہ طلب والے 15 روٹس پر ’لیڈیز اسپیشل‘ کی 30 ٹرپس اور 13 روٹس پر ’یونیورسٹی لیڈیز اسپیشل‘ (یو-ایس پی ایل) کی 26 ٹرپس شامل ہیں۔

یونیورسٹی لیڈیز اسپیشل بس سروس ہندو کالج، رام جس کالج، دولت رام کالج، شری رام کالج، ایل ایس آر، گارگی کالج، اے آر ایس ڈی، ہنس راج کالج، ایس پی ایم کالج، دیش بندھو کالج اور اے جی جی ایس سی سی جیسے کئی اہم تعلیمی اداروں کے لیے خصوصی کنیکٹیویٹی فراہم کرے گی۔

الیکٹرک موبیلیٹی ایکو سسٹم کو مزید مضبوط بنانے کی کوششوں کے تحت ڈی ٹی سی نے راج گھاٹ ڈپو-I پر ایک پبلک ای وی چارجنگ اسٹیشن بھی قائم کیا ہے۔ تقریباً 5.50 کروڑ روپے کی لاگت سے تیار یہ ای وی چارجنگ اسٹیشن شہر کے الیکٹرک وہیکل انفراسٹرکچر کو مزید مضبوط بنانے میں مدد دے گا۔