نجی مسافر بس پل کے نیچے گرجانے سے 24 افراد کی موت، 39 زخمی

کھرگون، مئی۔مدھیہ پردیش کے کھرگون ضلع کے اون تھانہ کے علاقے میں ایک نجی مسافر بس کے ریلنگ توڑ کر بوراڈ ندی میں گرجانے کے ایک بڑے حادثے میں تین بچوں سمیت 24 مسافروں کی موت اور 39 مسافر زخمی ہو گئے۔ کلکٹر شیوراج سنگھ ورما نے بتایا کہ اون تھانہ علاقے کے ڈونگرگاؤں کے نزدیک بوراڈ ندی کے پل کی ریلنگ توڑکر ایک نجی مسافر بس نیچے گر گئی، جس کی وجہ سے 15 سے زائد افراد کی موقع پر ہی موت ہو گئی۔ 50 کے قریب زخمیوں کو ضلع اسپتال لایا گیا جہاں ڈاکٹروں نے تین دیگر کو مردہ قرار دیا۔ 6 دیگر علاج کے دوران دم توڑ گئے۔ انہوں نے کہا کہ مرنے والوں میں تین بچے اور نو خواتین بھی شامل ہیں۔ انہوں نے بتایا کہ 11 زخمیوں کو اندور ریفر کر دیا گیا ہے۔ضلع کلکٹر نے کہا کہ واقعہ کی مجسٹریل انکوائری کا حکم دیا گیا ہے۔ اس واقعہ پر غم کا اظہار کرتے ہوئے وزیر اعلیٰ شیوراج سنگھ چوہان نے مرنے والوں کے لواحقین کو 4 لاکھ روپے، شدید زخمیوں کو 50 ہزار روپے اور نابالغ کو 25 ہزار روپے دینے کا اعلان کیا ہے۔ انہوں نے کہا کہ کھرگون اور اندور میں زخمیوں کا مکمل علاج کرایا جائے گا۔ واقعہ کے بعد ہیلی کاپٹر کے ذریعے کھرگون پہنچے انچارج وزیر کمل پٹیل نے بتایا کہ 35 نشستوں والی بس میں تقریباً 70 مسافر سوار تھے۔ انہوں نے کہا کہ حکومت اس واقعہ پر سنجیدہ ہے اور آر ٹی او برکھا گوڑ کو فوری اثرات سے معطل کر دیا گیا ہے۔ انہوں نے ضلع اسپتال میں داخل زخمی مسافروں سے بات چیت کی بنیاد پر بتایا کہ بس کی رفتار بہت تیز تھی۔ انہوں نے کہا کہ ضلع کلکٹر اور پولیس سپرنٹنڈنٹ کو ہدایات دی گئی ہیں کہ ضلع میں تمام مسافر بسوں کی فٹنس اور دیگر دستاویزات کو فوری طور پر چیک کیا جائے۔ کھرگون کے ایم ایل اے روی جوشی کے الزامات پر انہوں نے کہا کہ اگر پل کی تعمیر میں کوئی تکنیکی خرابی ہوئی ہے تو تحقیقات کے بعد قصورواروں کے خلاف کارروائی کی جائے گی۔کھرگون کے سب ڈویژنل آفیسر (پولیس) راکیش موہن شکلا نے بتایا کہ ضلع ہیڈکوارٹر سے 34 کلومیٹر دور پیش آنے والے حادثے کی بنیادی وجہ یہ ہے کہ ڈرائیور سنیل راٹھور کو نیند آگئی تھی۔ تاہم انہوں نے کہا کہ اس کی کوئی تکنیکی وجہ بھی ہو سکتی ہے۔ انہوں نے بتایا کہ گاڑی کا ڈرائیور شدید زخمی ہے جبکہ بس کنڈکٹر سنتوش بارچے کی موت ہو گئی ہے۔انہوں نے بتایا کہ صبح تقریباً 9 بجے پیش آنے والے اس واقعہ کے بعد ڈونگرگاؤں اور لونارہ کے گاوں والوں نے موقع پر پہنچ کر بس کے شیشے توڑ کر زخمیوں کو باہر نکالا۔ انہوں نے پولیس کے موقع پر پہنچنے سے پہلے ہی اپنے وسائل کی مدد سے بس کو سیدھا کھڑا کر دیا۔ اس کے بعد وہ زخمیوں کو پرائیویٹ گاڑیوں میں مقامی اسپتال بھی لے گئے۔ سنگھ نے بتایا کہ نجی مسافر بس صبح 6:30 بجے کھرگون ضلع کے بیجاپور سے اندور کے لیے روانہ ہوئی تھی۔انہوں نے بتایا کہ ایک 2 سالہ لڑکا جس کا ایک ہاتھ پہلے سے ٹوٹا ہوا تھا مکمل طور پر محفوظ رہا۔ حالانکہ اس کے والدین اس واقعے میں زخمی ہوئے ہیں۔ وہ اس کا ہاتھ دکھانے اندور لے جا رہے تھے۔اندور سے موقع پر پہنچے آئی جی رورل زون راکیش گپتا نے بتایا کہ زخمی بس ڈرائیور بار بار اپنا بیان بدل رہا ہے۔ مختلف تکنیکی اور پولیس تفتیش کی بنیاد پر واقعہ کی واضح وجہ معلوم ہو سکے گی۔لونارہ کی سیما واسکلے نے بتایا کہ ایک درجن سے زیادہ رشتہ دار جو اس کی بھابھی کی شادی کے لیے آئے تھے وہ بھی اسی بس میں باروانی ضلع کے ٹھکری تھانہ علاقے کے گھاٹوا کے لیے روانہ ہوئے تھے۔ انہوں نے بتایا کہ اس کے رشتہ دار منگتی بائی، آنچل، پنکی مالو بائی اور لکشمی بائی اس واقعے میں ہلاک ہو گئے جبکہ باقی زخمی ہیں۔