ملک کی ترقی میں طلباء کا اہم تعاون کی توقع ، طلبا نیا سیکھنے کی کوشش کریں: مرمو

چندی گڑھ، اپریل۔ صدر جمہوریہ دروپدی مرمو نے ہریانہ میں واقع نیشنل ڈیری ریسرچ انسٹی ٹیوٹ، کرنال کے 19ویں کنووکیشن میں 544 طلباء کو ڈگریاں اور گولڈ میڈل سے نوازا۔اس موقع پر طلباء کو مبارکباد پیش کرتے ہوئے محترمہ مرمو نے کہا “آپ سب اپنی زندگی کے ایک نئے باب کی طرف بڑھ رہے ہیں ۔ اس لیے آپ کو ہمیشہ نئی چیزیں سیکھنے اور لوگوں کی فلاح و بہبود کے لیے کام کرنے کی کوشش کرنی چاہیے۔صدر نے طلباء پر زور دیا کہ وہ ملک کی ترقی میں نمایاں کردار ادا کریں اور ڈیری انڈسٹری میں روزگار کے حصول کے ساتھ ساتھ کاروباری بنیں۔ اس میدان میں ترقی کے بے پناہ امکانات ہیں اور آپ کو ان امکانات سے فائدہ اٹھانا چاہیے۔صدر جمہوریہ نے کہا کہ ہندوستان دنیا کا سب سے بڑا دودھ پیدا کرنے والا ملک ہے اور دنیا کی دودھ کی پیداوار میں اس کا حصہ تقریباً 22 فیصد ہے۔ ڈیری کا شعبہ ملک کی مجموعی گھریلو پیداوار (جی ڈی پی) میں تقریباً پانچ فیصد حصہ ڈالتا ہے اور ڈیری صنعت سے بالواسطہ طور پر آٹھ کروڑ خاندانوں کو روزی روٹی فراہم کرتا ہے۔ ڈیری انڈسٹری کے انتظام میں خواتین کی 70 فیصد سے زیادہ شرکت ہے۔ خواتین کو خود انحصار بنانے اور ان کی سماجی اور معاشی حالت میں تبدیلی لانے میں ڈیری کا شعبہ خصوصی اہمیت کا حامل ہے۔ یہ خوشی کی بات ہے کہ آج ڈگری حاصل کرنے والوں میں ایک تہائی سے زیادہ لڑکیاں ہیں اور گولڈ میڈل حاصل کرنے والوں میں بھی 50 فیصد لڑکیاں ہیں۔ خواتین کی تربیت اور ہنرمندی کی نشوونما کے لیے مزید مواقع فراہم کرنے کی ضرورت ہے تاکہ اس بات کو یقینی بنایا جا سکے کہ خواتین کو مساوی حقوق اور قیادت فراہم کرنے کے مساوی مواقع حاصل ہوں۔ اس کے ساتھ ہی خواتین کو ڈیری فارمنگ میں کاروباری بنانے کے لیے آسان قرضوں کا نظام بھی ہونا چاہیے۔محترمہ مرمو نے کہا کہ این ڈی آر آئی نے دودھ دینے والی گائے اور بھینسوں کو کلون کرنے کی ٹیکنالوجی تیار کی ہے، جو ایک قابل تعریف بات ہے۔ اس سے جانوروں کی دودھ کی پیداواری صلاحیت میں اضافہ ہو گا اور کسانوں کی آمدنی میں بھی اضافہ ہو گا۔صدر جمہوریہ نے کہا کہ دودھ کی پیداوار اور ڈیری سیکٹر کو پائیدار بنانا ہمارے سامنے ایک چیلنج ہے جس کے حل کے لیے حکومت سمیت تمام اداروں کا تعاون درکار ہے۔ انہوں نے کہا کہ این ڈی آر آئی گرین ہاؤس گیسوں کے اخراج کو کم کرنے کے لیے مختلف ٹیکنالوجیز کو فروغ دے رہا ہے۔ اس کے ساتھ ہی بائیو گیس کی پیداوار جیسی صاف توانائی پر بھی زور دیا جا رہا ہے۔اس موقع پر گورنر بنڈارو دتاتریہ نے کہا کہ یہ بڑی خوشی کی بات ہے کہ ملک میں دودھ کی پیداوار میں ہریانہ دوسرے نمبر پر آتا ہے۔ این ڈی آر آئی کرنال میں دیسی گائے کے بچھڑے کا کلون بنایا گیا ہے۔ انہوں نے کہا کہ ہندوستانی ڈیری صنعت میں ملک کی اقتصادی ترقی اور لاکھوں لوگوں کی زندگیوں کو بہتر بنانے میں تعاون کرنے کی بے پناہ صلاحیت ہے۔ صحیح پالیسیوں، سرمایہ کاری اور اختراع کے ساتھ، ہندوستان ڈیری صنعت میں عالمی رہنما بن سکتا ہے اور دوسرے سفید انقلاب کا صحیح وقت ہے۔ ڈیری انڈسٹری ہمارے ملک کے سب سے بڑے زرعی شعبوں میں سے ایک ہے، جو لاکھوں لوگوں کو روزگار کے مواقع فراہم کرتی ہے اور ہمارے قومی جی ڈی پی میں بھی نمایاں حصہ ڈالتی ہے۔ اسی طرح مویشی پالنا خوراک کی حفاظت کو یقینی بنانے، لاکھوں لوگوں کو غذائیت سے بھرپور خوراک فراہم کرنے اور کئی دیہی برادریوں کی روزی روٹی کو سہارا دینے میں اہم کردار ادا کرتا ہے۔تقریب میں موجود وزیر اعلیٰ منوہر لال کھٹر نے کہا کہ ریاستی حکومت ڈیری صنعت کو چلانے کے لیے بینکنگ سیکٹر سے بے روزگار نوجوانوں کو قرض فراہم کرے گی تاکہ نوجوان خود روزگار کے ذریعے پورے ملک کو دودھ کی فراہمی میں اہم کردار ادا کر سکیں۔ حال ہی میں حکومت کی جانب سے بیروزگار نوجوانوں کو روزگار فراہم کرنے کے لیے ایک سروے کیا گیا جس میں 60 فیصد نوجوانوں نے ڈیری سیکٹر میں خود روزگاری اختیار کرنے کی خواہش کا اظہار کیا۔ ایسے نوجوانوں کے خوابوں کو پنکھ دینے کے لیے ریاستی حکومت بینکنگ سیکٹر سے بات کرے گی اور کوآپریٹیو ڈپارٹمنٹ کے ذریعے اپنی ڈیری انڈسٹری قائم کرنے میں ان کی مدد کرے گی۔ انہوں نے کہا کہ این ڈی آر آئی کی وجہ سے کرنال کا نام آج بین الاقوامی سطح پر ہے۔ ہریانہ میں فی شخص دودھ کی دستیابی 1127 گرام ہے۔ کسانوں کی محنت کی وجہ سے ہریانہ جلد ہی سب سے زیادہ دودھ پیدا کرنے والی ریاست بن جائے گی۔زراعت اور کسانوں کی بہبود کے مرکزی وزیر نریندر تومر، مرکزی وزیر برائے ماہی پروری، حیوانات اور ڈیری پرشوتم روپالا، زراعت اور کسانوں کی بہبود کے مرکزی وزیر مملکت کیلاش چودھری، آئی سی اے آر-این ڈی آر آئی کے ڈائریکٹر اور وائس چانسلر ڈاکٹر دھیر سنگھ اور دیگر معززین تقریب میں موجود.موجود تھے۔