آئی این ایس وکرانت گھپلہ معاملے میں راؤت عرضی داخل کریں گے

کولہاپور،مارچ ۔ شیوسینا(ادھو ٹھاکرے گروپ)کے سینئر لیڈر اور راجیہ سبھا کے رکن سنجے راؤت نے جمعرات کو تنبیہ کی کہ وہ بھارتیہ جنتا پارٹی (بی جے پی) کے سینئر لیڈر کیریٹ سومیا اور دیگر 28 لیڈرکے خلاف مبینہ طور پر آئی این ایس وکرانت گھپلہ معاملے میں عرضی دائر کریں گے۔شہر کے دو روزہ دورے پر آئے مسٹر راؤت نے آج یہاں پریس کانفرنس میں کہا ”مسٹر سومیا نے ہندوستانی بحری جہا ز’آئی این ایس وکرانت‘کی اسکریپنگ سے جڑے معاملوں میں کروڑوں روپئے اکھٹے کئے ہیں۔ مسٹر سومیا نے کہا تھا کہ وہ یہ پیسہ ریاستی گورنر کے دفتر میں جمع کرا دیں گے،جو ابھی تک جمع نہیں کرائے گئے ہیں۔ پھر ریاستی حکومت نے اس معاملے میں جانچ کی ہدایت دی لیکن شندے فڑنویس حکومت کے اقتدار میں آنے کے بعد کلین چٹ دے کر جانچ کو بند کروا دیا۔“مسٹر راؤت نے کہا کہ ای او ڈبلیو کے ذریعے دیگر 28لوگوں کو بھی اسی طریقے سے کلین چٹ دی اور اسی سلسلے میں انہوں نے اس گھپلے کے خلاف پھر سے کورٹ میں عرضی دائر کرنے کا فیصلہ کیا ہے۔مسٹر راؤت نے کہا کہ حکومت کی مخالفت کرنے والوں کو فرضی مقدمہ میں جیل بھیج دیا گیا ہے، لیکن ایسے لوگوں کو جو اپوزیشن کو پریشان کر رہے ہیں، انہیں اگلے سال ہونے والے انتخاب میں حساب دینا ہوگا۔ انہوں نے کہا کہ یہاں تک کہ ممبئی کمشنر اقبال سنگھ نے بھی واضح کیا کہ اس وقت کے وزیر اعلی ادھو ٹھاکرے نے کورونا کے دوران اچھا کام کیا تھا، لیکن حکمراں پارٹی کے لیڈر مسٹر ٹھاکرے کو پریشان کر رہے تھے اور کورونا کے دور میں مبینہبدعنوانی جانچ کا مطالبہ کر رہے تھے، لیکن انہوں نے دعوی کیا کہ ایسا کوئی معاملہ نہیں تھا۔ مسٹر سومیا کو اتر پردیش کے وزیر اعلی یوگی آدتیہ ناتھ پر مجرمانہ مقدمہ درج کرنا چاہئے، جہاں کورونا کی وجہ سے بہت سارے لوگ مارے گئے تھے۔