ٹریلر اور ٹینکر کے ٹکرانے کے حادثے میں 4 افراد جاں بحق

اجمیر، فروری ۔راجستھان میں ضلع اجمیر کے بیور میں ٹریلر اور ٹینکر کے ٹکرانے کے حادثے میں ٹینکر ڈرائیور سمیت چار افراد کی موت ہو گئی۔مصدقہ اطلاعات کے مطابق بیور میں رات گئے پیش آنے والے اس خوفناک حادثے میں ٹینکر سے پٹرولیم مادہ نکل کر پھیل جانے کے بعد کچھ دیگر گاڑیاں بھی اس کی زد میں آ گئیں۔ اس کے ساتھ ہی موقع پر موجود کئی جھونپڑیوں میں بھی آگ لگ گئی جس کی وجہ سے لوگوں میں خوف وہراس پھیل گیا۔گاڑیوں کے تصادم کے باعث آگ لگنے کی اطلاع پر بیور تھانہ پولس، سب ڈویژنل آفیسر موقع پر پہنچ گئے اور کافی کوششوں کے بعد فائر بریگیڈ کی مدد سے آگ پر قابو پالیا گیا۔ واقعہ کی سنگینی کو دیکھتے ہوئے اجمیر ہیڈکوارٹر سے کلکٹر انشدیپ اور پولیس سپرنٹنڈنٹ چونرام جاٹ بھی موقع پر پہنچ گئے۔حادثے میں تین افراد کی موقع پر ہی موت ہو گئی۔جبکہ ایک شخص نے اسپتال میں دوران علاج دم توڑ دیا۔