صدرمصرکا شاندار استقبال

نئی دہلی، جنوری۔ہندوستان کے 74ویں یوم جمہوریہ کی تقریبات کے مہمان خصوصی مصر کے صدر عبدالفتاح السیسی کا آج صبح یہاں راشٹرپتی بھون کے صحن میں پورے فوجی اعزاز کے ساتھ شاندار استقبال کیا گیا۔صدر دروپدی مرمو اور وزیر اعظم نریندر مودی نے صبح 10 بجے راشٹرپتی بھون کے صحن میں مسٹر السیسی کی آمد پر گرمجوشی سے استقبال کیا۔ مہمان لیڈر نے تینوں افواج کے انٹر سروسز گارڈ آف آنر کا معائنہ کیا۔ اس کے بعد وزیر اعظم مسٹر مودی نے ان کا اپنے کابینہ کے ساتھیوں سے اور مسٹر السیسی نے اپنے وفد کے ارکان سے تعارف کرایا۔بعد ازاں میڈیا سے بات کرتے ہوئے مسٹر السیسی نے یوم جمہوریہ پر ہندوستان کے عوام اور حکومت کو مبارکباد پیش کی اور کہا کہ ہندوستان کے اس شاندار قومی دن کی تقریب میں مہمان خصوصی بننا ان کے لئے بڑے اعزاز کی بات ہے۔ انہوں نے کہا کہ ہندوستان اور مصر کے تعلقات کی تعریف توازن اور استحکام سے ہوتی ہے۔ ہم نے صرف تخلیقی پیش رفت دیکھی ہے۔ ہم بہت مثبت رہے ہیں۔راشٹرپتی بھون میں اعزازکے بعد، وزیر خارجہ ایس جے شنکر نے مسٹر السیسی سے ان کے ہوٹل میں خیرسگالی پر مبنی ملاقات کی اور اس کے بعد مہمان رہنما مہاتما گاندھی کے مقبرے پر خراج عقیدت پیش کرنے کے لیے راج گھاٹ گئے۔ تقریباً 11:30 بجے مسٹر السیسی حیدرآباد ہاؤس پہنچے جہاں وزیر اعظم مسٹر مودی نے ان کا استقبال کیا اور پھر دونوں قائدین نے نجی اور پھر وفود کی سطح پر میٹنگ شروع کی۔