ہماچل، گجرات میں پرانی پنشن اسکیم نافذ کریں گے: پرینکا

نئی دہلی، نومبر۔کانگریس نے کہا ہے کہ ہماچل پردیش اور گجرات اسمبلی انتخابات کے بعد اگر پارٹی حکومت بناتی ہے تو پرانی پنشن اسکیم کو لاگو کیا جائے گا۔کانگریس جنرل سکریٹری پرینکا گاندھی واڈرا نے جمعرات کو فیس بک پوسٹ میں کہا کہ پنشن ملک کی خدمت کرنے والے ہر سرکاری ملازم کی بڑھاپے کا سہارا ہے۔ پنشن حاصل کرنا ہر سرکاری ملازم کا حق ہے، جسے بی جے پی حکومت ان سے چھین رہی ہے، لیکن اگر کانگریس کی حکومت بنی تو پنشن اسکیم کو نافذ کیا جائے گا۔انہوں نے کہا کہ پنشن ملازمین کا حق، کانگریس پرانی پنشن اسکیم کو بحال کرے گی۔ پرانی پنشن کو ختم کرکے بی جے پی نے ملک کے بزرگوں سے ان کی مالی حفاظت چھین لی۔ جو اہل وطن زندگی بھر ملک کی خدمت کرتے ہیں وہ بڑھاپے میں کہاں جائیں؟ اپنی زندگی کیسے گزاریں۔ جب کوئی شخص سرکاری ملازمت میں جاتا ہے تو وہ سوچتا ہے کہ جب وہ ریٹائر ہو جائے گا تو اسے مالی عدم تحفظ کا سامنا نہیں کرنا پڑے گا۔ پنشن کے ساتھ ان کی دیکھ بھال جاری رہے گی لیکن بی جے پی صرف چھیننا جانتی ہے۔ ہمارے فوجی جو سرحدوں پر اپنی جان ہتھیلیوں میں رکھ کر ملک کی حفاظت کرتے ہیں، ان کی معاشی سلامتی بھی ایک ایک کرکے چھینی جا رہی ہے۔انہوں نے کہا، ’’کانگریس کا ماننا ہے کہ جن ملازمین نے ملک کی تعمیر میں تعاون کیا ہے انہیں پنشن ملنی چاہئے تاکہ وہ بڑھاپے میں بھی خود انحصار رہ سکیں۔ یہ ہر ملازم کا حق ہے۔ اس بات کو ذہن میں رکھتے ہوئے چھتیس گڑھ اور راجستھان کی کانگریس حکومتوں نے پرانی پنشن اسکیم کو نافذ کیا۔پارٹی کا عزم ہے کہ حکومت بنتے ہی ہماچل پردیش اور گجرات میں بھی پرانی پنشن اسکیم کو نافذ کیا جائے گا۔