نوئیڈا میں جڑواں ٹاورز کے انہدام میں حفاظتی معیارات پر سختی سے عمل کریں: وزیر اعلیٰ
لکھنؤ، اگست۔ اتر پردیش کے وزیر اعلی یوگی آدتیہ ناتھ نے سپریم کورٹ کے حکم پر نوئیڈا میں تعمیر شدہ کثیر منزلہ رہائشی عمارت ٹوئن ٹاورز کو گرانے کے دوران حفاظتی اصولوں پر سختی سے عمل کرنے کا حکم دیا ہے۔ مسٹر یوگی نے جمعہ کو 28 اگست کو ٹوئن ٹاورز کو گرانے کی تیاریوں کا جائزہ لیا۔ جائزہ اجلاس میں انہوں نے کہا کہ 28 اگست کو ارد گرد کے رہائشی کمپلیکس کو انتہائی احتیاط کے ساتھ صبح سویرے خالی کرایا جاناچاہئے ۔ مقامی انتظامیہ 28 اگست کو دوپہر 02:30 بجے جڑواں ٹاورز کو گرائے جانے سے پہلے صبح اپنے پڑوس میں میں واقع ایمرالڈ کورٹ اور اے ٹی ایس ولیج سوسائٹی کو خالی کرا دے گی۔ اس دوران ٹوئن ٹاورز کے اطراف کی سڑکوں پر ٹریفک کی نقل و حرکت پر پابندی ہوگی۔ یہاں تک کہ نوئیڈا-گریٹر نوئیڈا ایکسپریس وے بھی انہدام کے وقت آدھے گھنٹے تک بند رہے گا۔ اجلاس میں بتایا گیا کہ جڑواں ٹاورز کو گرانے کے لیے دونوں ٹاورز میں 9600 سوراخوں سے 3700 کلو گرام دھماکہ خیز مواد بھرا گیا ہے۔قابل ذکر ہے کہ نوئیڈا ڈیولپمنٹ اتھارٹی کے 26 اہلکاروں، ملازمین، بلڈروں اور آرکیٹیکٹس کے خلاف اب تک کارروائی کی جا چکی ہے، جنہیں تعمیراتی کمپنی سوپرٹیک کے ذریعے جڑواں ٹاوروں کی تعمیر میں بے قاعدگیوں کا قصوروار پایا گیا تھا۔ وزیراعلیٰ کی ہدایت پر اس معاملے کی انکوائری کی گئی تھی۔ اس معاملے میں سپریم کورٹ کی طرف سے عمارت کو گرانے کے حکم کے بعد وزیر اعلی یوگی نے ڈیڑھ دہائی پرانے اس معاملے کی مکمل جانچ ہوئی۔ تحقیقات میں نوئیڈا ڈیولپمنٹ اتھارٹی کے ملازمین اور بلڈر کی ملی بھگت ثابت ہوئی ہے۔ واضح رہے کہ 2004 اور 2006 کے درمیان، M/s Supertech Construction Pvt Ltd کو نوئیڈا ڈیولپمنٹ اتھارٹی نے پلاٹ نمبر GH 04، سیکٹر 93A میں 54,820 مربع میٹر زمین الاٹ کی تھی۔ اس اراضی پر اتھارٹی کی جانب سے مختلف اوقات میں نقشے منظور کیے گئے۔منظور شدہ نقشے کے مطابق کل 17 ٹاورز بنائے جانے تھے۔ جس میں کل 660 رہائشی یونٹس کی منظوری دی گئی۔ ان میں سے 15 ٹاورز 15-15 منزلوں کے ہیں اور 02 ٹاور 30 اور 32 منزلوں کے ہیں۔ سپریم کورٹ نے 31 اگست 2021 کو 17 ٹاورز میں سے جڑواں ٹاورز کے درمیان مطلوبہ کم از کم کھلے علاقے کی عدم دستیابی اور پچھلے الاٹیوں سے رضامندی نہ لینے کی وجہ سے اسے تین ماہ کے اندر مسمار کرنے کا حکم دیا تھا۔ انہدام پر خرچ ہونے والی پوری رقم سپرٹیک لمیٹڈ کو برداشت کرنا ہوگا۔ منتخب ایجنسی کی اپیل پر سپریم کورٹ نے انہدام کی آخری تاریخ 28 اگست تک بڑھا دی ہے۔
