ملک کی کئی ریاستوں میں آفت بنی بارش

نئی دہلی:جولائی۔ قومی راجدھانی دہلی اور مغربی اتر پردیش میں بارش کافی انتظار کے بعد بارشوں کا سلسلہ شروع ہوا، وہیں ملک کی کئی ریاستوں میں بھاری بارش نے معمولات زندگی درہم برہم کر دئے ہیں۔ گجرات، مہاراشٹر، ہماچل پردیش اور کرناٹک میں ہندوستان کے محکمہ موسمیات (آئی ایم ڈی) نے مزید بارشوں کا الرٹ جاری کیا ہے۔ گجرات اور مہاراشٹر میں تقریباً 140 افراد کی جان چلی گئی ہے۔ رپورٹ کے مطابق بھاری بار کے سبب مہاراشٹر میں اب تک 76 جبکہ گجرات میں 63 افراد ہلاک ہو گئے ہیں، جبکہ بڑی تعداد میں لوگ متاثر ہوئے ہیں۔ گجرات کے ولساڈ سمیت 5 اضلاع میں ریڈ الرٹ جاری کیا گیا ہے، جبکہ 8 اضلاع میں آرنج الرٹ جاری کیا گیا ہے۔ ادھر مہاراشٹر میں تانسا ندی اپھان پر ہے اور خطرے کے نشان سے اوپر بہہ رہی ہے۔ اپھنتے دریاؤں کے ساتھ آبشاروں نے بھی خوفناک روپ اختیار کر لیا ہے۔ گڑھ چرولی میں سیلاب کی صورت حال پیدا ہو گئی ہے۔ وین گنگا ندی میں اپھان کی وجہ سے کئی گاؤں پانی میں ڈوب گئے ہیں۔ متعدد عمارتیں زیر آب نظر آ رہی ہیں۔ پانی بھر جانے کی وجہ سے لوگوں کو آمد و رفت میں مشکل پیش آ رہی ہے۔ گجرات میں بارش نے لوگوں کی مشکلات میں اضافہ کر دیا ہے۔ جام نگر، کچھ، موربی، نرمدا، نواساری، سورت سمیت متعدد اضلاع کے حالات کم و بیش ایک جیسے ہیں اور ہر سو پانی ہی پانی نظر آ رہا ہے۔ بھاری بارش کی وجہ سے گجرات کےک تاپی کا ڈوسواڈا ڈیم اوور فلو ہونے لگا ہے۔ ڈیم کا پانی آس پاس کے گاؤں میں بھر رہا ہے جس سے لوگ خوف زدہ ہیں۔ نوساری ضلع میں شہر سے گاؤں تک لوگوں کا برا حال ہے اور پورا ضلع زیر آب ہو گیا ہے۔ اس ضلع سے بہنے والی امبیکا اور پورنا ندیاں خطرے کے نشان سے اوپر آ گئی ہیں۔ ساحلی علاقوں میں آباد لوگ خوف زدہ ہیں اور انتظامیہ انہیں محفوظ مقامات پر لے جانے کی کوشش کر رہے ہیں۔ گجرات میں بارشوں کے سبب لینڈ سلائڈنگ بھی ایک مسئلہ ہے، جس کی وجہ سے لوگ کافی پریشان ادھر، مدھیہ پردیش کے رائے سین کا بارنا ڈیم بھی اوور فلو ہو رہا ہے، اس کے 6 گیٹ کھول دئے گئے، جس سے آس پاس کے علاقہ میں پانی بھر گیا۔ نیشنل ہائی وے 145 پر بنا پل بھی زیر آبا آ گیا۔ اگر بارش کا سلسلہ جاری رہا تو ڈیم سے مزید پانی چھوڑنا پڑے گا، جس سے مشکلات میں مزید اضافہ ہوگا۔