جسٹس راکیش کمار جین لکھیم پور کھیری قتل کی جانچ کی نگرانی کریں گے: سپریم کورٹ

نئی دہلی، نومبر۔سپریم کورٹ نے بدھ کو پنجاب اور ہریانہ ہائی کورٹ کے ریٹائرڈ جسٹس راکیش کمار جین کو لکھیم پور کھیری قتل کیس کی خصوصی تفتیشی ٹیم (ایس آئی ٹی) کی جانچ کی نگرانی کے لیے مقرر کیا ہے۔ چیف جسٹس این۔ وی رمنا کی سربراہی میں تین رکنی بنچ نے سماعت کے دوران کہا کہ جسٹس راکیش کمار جین کی تقرری تحقیقات میں مکمل "منصفانہ اور آزادی” کو یقینی بنانے کے لیے کی گئی ہے۔ اتر پردیش حکومت نے ڈویژن بنچ کو تحقیقات کی نگرانی کی ذمہ داری ہائی کورٹ کے ایک ریٹائرڈ جج کو سونپنے کے لیے اپنی رضامندی دی تھی۔ سپریم کورٹ نے اتر پردیش کی حکومت کو تین سینئر انڈین پولیس سروس (آئی پی ایس) افسران کی تقرری کرنے کی ہدایت دی ہے۔ این ایس شروڈکر، دیپندر سنگھ اور پدمجا چوہان کو بھی ایس آئی ٹی کی جانچ ٹیم میں شامل کرنے کا حکم دیا گیا ہے۔ عدالت نے کہا کہ وہ چارج شیٹ داخل ہونے اور جسٹس جین کی رپورٹ موصول ہونے کے بعد اس معاملے کی اگلی سماعت کرے گی۔ ڈیویژن بنچ کے سامنے سماعت کے دوران، یوگی آدتیہ ناتھ حکومت کی طرف سے پیش ہوئے سینئر وکیل ہریش سالوے نے معاوضے کے معاملے پر کہا کہ ایک مسئلہ ہے کہ کیا یہ ان لوگوں کو دیا جائے جو ملزمان کے قتل کا الزام لگا رہے ہیں۔ سپریم کورٹ نے 15 نومبر کو اپنی آخری سماعت میں کہا تھا کہ وہ لکھیم پور کھیری تشدد واقعہ کی تحقیقات کی روزانہ کی نگرانی کے لیے کچھ ریٹائرڈ ججوں کے ناموں پر غور کرے گی۔ بنچ نے اترپردیش حکومت سے کہا تھا کہ وہ 03 اکتوبر کو ہوئے تشدد میں ہلاک ہونے والوں کو معاوضہ دینے کے معاملے میں مناسب کارروائی کرے۔ اس سے قبل 8 نومبر کو ڈویژن بنچ نے اتر پردیش پولیس کی تحقیقات پر سوال اٹھاتے ہوئے ریاستی حکومت کو پھٹکار لگائی تھی اور اسے حکومت کی ایس آئی ٹی جانچ کی نگرانی کرنے کو کہا تھا، جسٹس راکیش کمار جین، پنجاب اور ہریانہ ہائی کورٹ کے سابق جج رنجیت سنگھ کی تقرری ریاستی حکومت کے سامنے رکھی گئی۔ 3 اکتوبر کو مرکزی حکومت کے تین نئے زرعی قوانین کے خلاف احتجاج کرنے والے کسانوں نے لکھیم پور کھیری کی سڑکوں پر مظاہرہ کیا تھا۔ وہ مرکزی وزیر داخلہ اجے مشرا کے آبائی گاؤں میں منعقدہ ایک تقریب میں اتر پردیش کے نائب وزیر اعلیٰ کیشو موریہ کی آمد کے خلاف احتجاج کر رہے تھے۔ اس دوران کار کی زد میں آکر چار کسانوں کی المناک موت ہو گئی۔ کسانوں کا الزام ہے کہ جس کار سے چار افراد کو کچل دیا گیا، اس میں مرکزی وزیر مملکت مشرا کا بیٹا آشیش مشرا سوار تھا اور اس نے جان بوجھ کر کسانوں کو کچلا تھا ۔ تاہم اس معاملے میں گرفتار آشیش نے بار بار اپنے الزامات سے انکار کرتے ہوئے کہا تھا کہ وہ موقع پر موجود نہیں تھا۔ کسانوں کو کچلنے کے بعد شروع ہونے والے تشدد میں بھارتیہ جنتا پارٹی کے دو کارکنوں، ایک مقامی صحافی سمیت چار دیگر افراد بھی مارے گئے۔ آٹھ اموات کے اس معاملے میں پولیس نے اب تک 13 لوگوں کو گرفتار کیا ہے۔ ملزمین میں آشیش مشرا اور اس کے کئی دوست شامل ہیں۔ آشیش کو اہم ملزم بتایا جا رہا ہے۔ حال ہی میں مقامی عدالت نے ان کی ضمانت کی درخواست مسترد کر دی تھی۔ سپریم کورٹ نے اس واقعے کے بعد اس معاملے کا ازخود نوٹس لیا تھا، جسے دو وکلاء کے خطوط کی بنیاد پر سماعت کے پہلے ہی دن ایک پی آئی ایل میں تبدیل کر دیا گیا تھا۔ وکلاء نے اس معاملے کی منصفانہ اور آزادانہ جانچ کے لیے عدالتی تحقیقات اور سی بی آئی انکوائری کا مطالبہ کیا ہے۔ اہم بات یہ ہے کہ کسانوں کی کئی تنظیمیں مرکزی حکومت کے تین نئے زرعی قوانین کے خلاف تقریباً ایک سال سے ملک بھر میں احتجاج کر رہی ہیں۔ یونائیٹڈ کسان مورچہ کے بینر تلے 40 سے زیادہ کسان تنظیمیں دارالحکومت دہلی کی سرحدوں اور ملک کے دیگر حصوں میں مسلسل احتجاج کر رہی ہیں۔ کسانوں کی تنظیمیں مرکزی حکومت کی طرف سے تین زرعی قوانین – کسانوں کی پیداوار تجارت (کامرس پروموشن اینڈ فیسیلیٹیشن) ایکٹ-2020، کسان (امپاورمنٹ اینڈ پروٹیکشن) قیمت کی یقین دہانی اور ایگری کلچرل سروسز ایکٹ-2020 اور ضروری اشیاء (ترمیم) ایکٹ۔ 2020 کی مخالفت کر رہے ہیں۔ جنوری میں سپریم کورٹ نے کسانوں کے احتجاج کے پیش نظر ان قوانین کے نفاذ پر روک لگا دی تھی۔