ترقی یافتہ اتر پردیش کے خواب کو شرمندہ تعبیر کرنے کےلئے نوجوان فعال کردار ادا کریں: یوگی آدتیہ ناتھ

لکھنؤ، ۔ وزیر اعلیٰ یوگی آدتیہ ناتھ نے نوئیڈا میں منعقد ہونے والے انٹرنیشنل ٹریڈ شو کے حوالے سے ریاست کے عوام کے نام خط لکھا ہے۔ یوپی انٹرنیشنل ٹریڈ شو کا چوتھا ایڈیشن 25 سے 29 ستمبر تک گریٹر نوئیڈا کے انڈیا ایکسپو سینٹر اینڈ مارٹ میں منعقد ہوگا۔وزیر اعلیٰ یوگی آدتیہ ناتھ نے اپنے خط میں لکھا ہے کہ 2023 میں شروع کیا گیا یوپی انٹرنیشنل ٹریڈ شو ریاست کی مصنوعات کو عالمی سطح پر متعارف کرانے کی ایک اہم پہل ہے۔ انہوں نے کہا کہ ریاست میں ڈبل انجن حکومت قائم ہونے کے بعد روزگار کے مواقع پیدا کرنا حکومت کی اولین ترجیح بن گیا۔

وزیر اعلیٰ نے کہا کہ او ڈی او پی(ایک ضلع، ایک پروڈکٹ) اور ایم ایس ایم ای کے ذریعے چار کروڑ سے زائد روزگار کے مواقع پیدا ہوئے ہیں۔ ایک ضلع، ایک پروڈکٹ جیسی پہل کی کامیابی سے حوصلہ پاکر ایک نئی پہل او ڈی او سی شروع کی گئی۔ انہوں نے کہا کہ اتر پردیش کو بیما رو ریاست کی شبیہ سے نکال کر ایک ’فیسٹیول اسٹیٹ‘ بنانا ایک بڑا چیلنج تھا، لیکن اسے پورا کیا گیا۔
وزیر اعلیٰ نے کہا کہ ریاست کی برآمدات میں دو لاکھ کروڑ روپے سے زیادہ کی حصہ داری ہے۔ آج اتر پردیش کی معیشت ترقی کا انجن بن چکی ہے اور ریاست میں سرمایہ کاری کا ہدف 15 لاکھ کروڑ روپے سے تجاوز کرچکا ہے۔ انہوں نے کہا کہ ملک اور بیرون ملک سے لوگ اتر پردیش میں سرمایہ کاری کرنا چاہتے ہیں۔ ریاست میں سرمایہ کاری بڑھنے سے روزگار کے نئے مواقع پیدا ہوتے ہیں، جس کا فائدہ نوجوانوں کو ملتا ہے۔انہوں نے کہا کہ یوپی انٹرنیشنل ٹریڈ شو مقامی صلاحیت اور مصنوعات کو عالمی بازار تک پہنچانے کا ایک اہم پلیٹ فارم ہے۔ انہوں نے نوجوانوں، طلبہ، نو آموز اور مستقبل کے صنعت کاروں سے اپیل کی کہ وہ ٹریڈ شو سے فائدہ اٹھائیں۔یوگی آدتیہ ناتھ نے نوجوانوں سے کہا کہ وہ نئے روابط قائم کریں، نئی منڈیوں کی تلاش کریں اور اپنی صلاحیت کے مطابق مواقع سے فائدہ اٹھائیں۔ انہوں نے کہا کہ کاروبار اور صنعت کاری کے حوالے سے بیداری بڑھانے اور اپنے آس پاس دستیاب مواقع کو پہچاننے کا یہ مناسب وقت ہے۔

وزیر اعلیٰ نے نوجوانوں سے اپیل کی کہ ان کی کوششوں سے مقامی صلاحیت عالمی بازار تک پہنچے گی اور ترقی یافتہ اتر پردیش کے خواب کو شرمندہ تعبیر کرنے کے لیے نوجوان فعال طور پر حصہ لیں۔