راہل 9 اپریل کو عوامی جلسہ سے خطاب کریں گے: سدارمیا
بنگلور، یکم اپریل ۔کرناٹک میں 10 مئی کو ہونے والے اسمبلی انتخابات سے پہلے کانگریس لیڈر راہل گاندھی 9 اپریل کو کولار میں ‘جئے بھارت ریلی کرکے بھارتیہ جنتا پارٹی پر سخت حملہ کریں گے۔یہ اطلاع کانگریس کے سینئر لیڈر اور ریاست کے سابق وزیر اعلیٰ سدارمیا نے ہفتہ کے روز دی۔ انہوں نے یہاں نامہ نگاروں سے کہا، مسٹر راہل گاندھی 9 اپریل کو کولار میں ہوں گے اور ‘جئے بھارت ریلی سے خطاب کرکے ریاست میں ہونے والی انتخابی مہم کا آغاز بھی کریں گے۔مسٹر راہل گاندھی پہلے 5 اپریل کو ریلی سے خطاب کرنے والے تھے لیکن کسی کام کی وجہ سے اسے ملتوی کر دیا گیا۔مسٹر سدارمیا ‘جے بھارت ریلی کی تیاریوں کا جائزہ لینے یہاں پہنچے ہیں۔ لوک سبھا کے رکن کے طور پر نااہل ہونے کے بعد مسٹر گاندھی کی یہ پہلی ریلی ہوگی۔ اسے سورت کی ضلعی عدالت نے قصوروار ٹھہرایا تھا اور 2019 میں کولار میں ایک انتخابی ریلی میں کیے گئے ان کے ‘مودی ‘ کے خلاف تبصرے پر ہتک عزت کے مقدمے میں دو سال قید کی سزا سنائی تھی۔سورت سے بھارتیہ جنتا پارٹی (بی جے پی) کے ایم ایل اے پورنیش مودی نے مسٹر گاندھی کے خلاف مجرمانہ ہتک عزت کا مقدمہ دائر کیا تھا۔ مسٹر گاندھی کو عدالت کی طرف سے قصوروار ٹھہرائے جانے کے بعد لوک سبھا سے نااہل قرار دے دیا گیا تھا۔ الیکشن کمیشن نے کرناٹک میں 10 مئی کو پولنگ اور 13 مئی کو ووٹوں کی گنتی کی تاریخ کا اعلان کیا ہے۔
