نیپال: تباہ ہونے والے طیارے کا ملبہ مل گیا، 14 لاشیں نکال لی گئیں

کھٹمنڈو، مئی۔نیپال کے تارا ایئر کے طیارے کے حادثے کی جگہ سے پیر کو 14 لاشیں برآمد ہوئیں، جو اتوار کو 22 لوگوں کے ساتھ لاپتہ ہو گیا تھا، جن میں چار ہندوستانی بھی شامل تھے۔مقامی اخبار’ کھٹمنڈو پوسٹ‘ نے امدادی کارکنوں کا حوالہ دیتے ہوئے اپنی رپورٹ میں کہا ہے کہ امدادی کارکنوں نے تارا ایئر کے حادثے کی جگہ سے 14 لاشیں نکال لی ہیں اور باقی کی باقیات کی تلاش جاری ہے۔نیپالی فوج نے کہا کہ طیارے کا ملبہ طیارے کے لاپتہ ہونے کے تقریباً 20 گھنٹے بعد ملا۔ ملک کے شمال مغربی حصے میں مستونگ ضلع کے تھسانگ کے سانو سورے بھیر میں 14,500 فٹ کی بلندی پر ملبہ ملا۔نیپالی فوج کے ترجمان نارائن سلوال نے ٹویٹ کیا، "سرچ اینڈ ریسکیو ٹیم نے تباہ ہونے والے طیارے کا پتہ لگا لیا ہے۔”تارا ایئر کے ترجمان سدرشن برٹولا نے ریسکیو اہلکاروں سے موصول ہونے والی معلومات کی بنیاد پر بتایا کہ اب تک 14 افراد کی لاشیں نکالی جا چکی ہیں۔مسٹر برٹولا نے کہا کہ پہاڑ سے ٹکرانے کے بعد طیارہ ٹکڑے ٹکڑے ہو گیا۔ پہاڑی پر لاشیں بکھری پڑی ہیں۔مستونگ کے چیف ڈسٹرکٹ آفیسر نیترا پرساد شرما نے کہا کہ جائے حادثہ کا پتہ مقامی لوگوں کی فراہم کردہ معلومات کی مدد سے لگایا گیا جو یارشگمبا (کیٹرپلر فنگس) کو جمع کرنے گئے تھے۔ اتوار کو خراب موسم کی وجہ سے سرچ اور ریسکیو ٹیمیں جائے حادثہ پر نہیں پہنچ سکیں۔نیپال کی فوج نے اتوار کی شام کہا کہ اندھیرے اور خراب موسم کی وجہ سے تلاش اور بچاو¿ آپریشن روک دیا گیا ہے۔ آج صبح فضائی اور زمینی سطح پر دوبارہ سرچ آپریشن شروع کیا گیا۔قابل ذکر ہے کہ تارا ایئر کا ٹوئن اوٹر طیارہ جس نے پوکھرا ہوائی اڈے سے ٹیک آف کیا تھا، اتوار کی صبح لاپتہ ہو گیا تھا۔ طیارے میں 19 مسافر اور عملے کے تین ارکان سوار تھے۔ فضائی کمپنی کے مطابق مسافروں میں 13 نیپالی، چار ہندوستانی اور دو جرمن شہری شامل تھے۔