لداخ کے لیفٹیننٹ گورنر نے دو آبی ذخائر کی تعمیر کا سنگ بنیاد رکھا

جموں: لداخ کے لیفٹیننٹ گورنر ونے کمار سکسینہ نے کرگل ضلع کے سودھ بلاک میں پروجیکٹ ہِیم سروور کے تحت دو آبی ذخائر کی تعمیر کا سنگ بنیاد رکھا۔ ان ذخائر میں مجموعی طور پر 60 سے 70 لاکھ لیٹر پانی ذخیرہ کرنے کی گنجائش ہوگی اور ان کی تعمیر نومبر کے آخر تک مکمل ہونے کی توقع ہے۔علاقے میں پانی کی شدید قلت کے باعث زراعت متاثر ہو رہی ہے، جبکہ بعض دیہاتیوں کو اپنے آبائی گاؤں چھوڑنے پر بھی مجبور ہونا پڑا ہے۔ اس منصوبے کے تحت قریبی گلیشیئر ندی نالوں کے پانی کو آبی ذخائر تک پہنچایا جائے گا، تاکہ دیہات میں سال بھر پانی کی فراہمی یقینی بنانے کے ساتھ زرعی سرگرمیوں کو بھی فروغ دیا جاسکے۔

لیفٹیننٹ گورنر نے سوشل میڈیا پلیٹ فارم ایکس پر جاری بیان میں کہا کہ انہوں نے 2 ستمبر 2026 کو لداخ کی رکن پارلیمان حنیفہ جان کے ہمراہ سودھ کا دورہ کیا تھا، جہاں انہوں نے پانی کی شدید قلت اور اس کے نتیجے میں زراعت کو پہنچنے والے نقصان کا جائزہ لیا۔انہوں نے بتایا کہ دورے کے بعد ضلع انتظامیہ کو ہدایت دی گئی تھی کہ پانی کے ممکنہ ذرائع، خصوصاً قریبی گلیشیئر ندی نالوں کی نشاندہی کرکے ان کا پانی دیہات تک پہنچانے کے اقدامات کیے جائیں۔سکسینہ نے کہا کہ دونوں آبی ذخائر کی تعمیر سے علاقے میں پانی کی قلت دور کرنے، زراعت کو سہارا دینے اور پانی کی کمی کے باعث ہونے والی نقل مکانی پر قابو پانے میں مدد ملنے کی امید ہے۔ انہوں نے دور دراز علاقوں میں بنیادی سہولیات بہتر بنانے اور عوام کو پانی کی پائیدار فراہمی یقینی بنانے کے عزم کا بھی اظہار کیا۔