مودی بدھ کو بستی میں سانسد کھیل مہاکمبھ کے دوسرے مرحلے کا افتتاح کریں گے

نئی دہلی، جنوری۔ وزیر اعظم نریندر مودی بدھ کو دوپہر ایک بجے ویڈیو کانفرنسنگ کے ذریعے مشرقی اتر پردیش کے بستی ضلع میں منعقد ہونے والے سانسد کھیل مہاکمبھ 2022-23 کے دوسرے مرحلے کا افتتاح کریں گے۔منگل کو جاری کردہ ایک ریلیز میں وزیر اعظم کے دفتر نے کہا کہ سانسد کھیل مہاکمبھ کا اہتمام بستی سے لوک سبھا کے رکن پارلیمنٹ ہریش دویدی 2021 سے کر رہے ہیں۔سانسد کھیل مہاکمبھ 2022-23 دو مرحلوں میں منعقد کیا جا رہا ہے۔ پہلا مرحلہ 10 سے 16 دسمبر تک اور دوسرا مرحلہ 18 سے 28 جنوری تک چلے گا۔یہ سانسد کھیل مہاکمبھ ایک منفرد اقدام ہے جو بستی ضلع اور آس پاس کے علاقوں کے نوجوانوں کو اپنی کھیلوں کی صلاحیتوں کو ظاہر کرنے اور انہیں کھیلوں کو کیریئر کے آپشن کے طور پر اپنانے کی ترغیب دینے کا ایک موقع اور پلیٹ فارم فراہم کرتا ہے۔ یہ علاقے کے نوجوانوں میں نظم و ضبط، ٹیم ورک، صحت مند مسابقت، خود اعتمادی اور قوم پرستی کے جذبے کو ابھارنے کی بھی کوشش کرتا ہے۔کھیل مہاکمبھ ان ڈور اور آؤٹ ڈور گیمز جیسے ریسلنگ، کبڈی، کھو کھو، باسکٹ بال، فٹ بال، ہاکی، والی بال، ہینڈ بال، شطرنج، کیرم، بیڈمنٹن، ٹیبل ٹینس وغیرہ میں مختلف مقابلے ہوتے ہیں۔ ان کے علاوہ مضمون نگاری، پینٹنگ میں مقابلے کھیل مہاکمبھ کے دوران رنگولی بنانے وغیرہ کا بھی اہتمام کیا جاتا ہے۔