اومیکرون انفیکشن پر گہری نظر

اس سے نمٹنے کے لیے پوری طرح تیار ہیں: منڈاویہ

نئی دہلی، دسمبر۔ حکومت نے آج کہا کہ وہ ملک میں نئے کووڈ ویرینٹ اومیکرون کے انفیکشن کی صورتحال پر گہری نظر رکھے ہوئے ہے اور اس سے نمٹنے کے لئے تمام تیاریاں کی جا رہی ہیں۔مرکزی وزیر صحت و خاندانی فلاح و بہبود منسکھ منڈاویا نے راجیہ سبھا میں ملک میں اومیکرون کے معاملوں میں اضافہ ہونے والی صورتحال پر بحث کا جواب دیتے ہوئے کہا کہ ملک میں اومیکرون کے 161 معاملے رپورٹ ہوئے ہیں۔ یہ معاملے مہاراشٹر، دہلی، اتر پردیش، راجستھان اور مدھیہ پردیش جیسی ریاستوں میں پائے گئے ہیں اور مرکزی اور ریاستی حکومتیں صورتحال پر گہری نظر رکھے ہوئے ہیں۔لکھیم پور کھیری واقعہ میں اپوزیشن اراکین مرکزی وزیر مملکت برائے داخلہ اجے مشرا کو ہٹانے اور اپوزیشن کے 12 اراکین کو معطل کرنے کا مطالبہ کرتے ہوئے نعرے لگا رہے تھے۔انہوں نے بتایا کہ اومیکرون سے ہونے والا انفیکشن اتنا سنگین نہیں ہے اور اس کے پھیلاؤ کو روکنے کے لیے معیاری طریقہ کار پر سختی سے عمل کیا جا رہا ہے اور اس کے تحت ہر قسم کی حفاظتی اور احتیاطی تدابیر اختیار کی جا رہی ہیں۔ اس سلسلے میں ماہرین کی ٹیم کے ساتھ مسلسل بات چیت کے بعد اس کے اثرات کا مطالعہ کیا جا رہا ہے۔ انہوں نے کہا کہ تمام پہلوؤں کو مدنظر رکھتے ہوئے وقتاً فوقتاً تمام ریاستوں کو ایڈوائزری جاری کی جاتی ہے۔ اس کے علاوہ ادویات اور دیگر ضروری چیزوں کے بفر اسٹاک کا بھی انتظام کیا گیا ہے۔ انہوں نے تمام ریاستی حکومتوں سے اپیل کی کہ وہ صحیح معلومات دے کر لوگوں کو بیدار کریں اور صورتحال سے نمٹنے میں تعاون کریں۔مسٹر منڈاویا نے بتایا کہ کورونا کی تحقیقات کو بڑھانے کے ساتھ ساتھ اومیکرون ویرینٹ سے متاثرہ کیسوں میں جینوم سیکوینسنگ کی مدد لی جا رہی ہے۔ اس کے لیے 38 لیبارٹریوں میں ٹیسٹ کیے جا رہے ہیں اور ان میں روزانہ 30 ہزار سے زائد جینومز کو ترتیب دینے کی صلاحیت موجود ہے۔ انہوں نے کہا کہ اس صلاحیت میں بھی تیزی سے اضافہ کیا جا رہا ہے۔وزیر صحت نے بتایا کہ کووڈ پیکیج-2 کے تحت تمام ریاستی حکومتوں کو ضروری رقم دی گئی ہے، جس سے صحت کے بنیادی ڈھانچے کو بڑھانے اور ضروری اشیاء کے ذخیرہ کو برقرار رکھنے میں مدد ملے گی۔مسٹر منڈاویا نے بتایا کہ ملک نے اب تک کورونا کے خلاف جنگ ایک ساتھ لڑی ہے اور مستقبل میں بھی سب کو مل کر اس وبائی مرض سے لڑنا ہے۔ ایک سوال کے جواب کے دوران انہوں نے ایوان میں شوروغل کرنے والے اپوزیشن اراکین سے کہا کہ کورونا وبا جیسے چیلنج کو سیاست کا معاملہ نہیں ہونا چاہیے اور اس سے نمٹنے کے لیے سب کو مل کر تجاویز دینا چاہیے۔ اگر سب مل کر بات کریں گے تو اچھی تجاویز سامنے آئیں گی جنہیں اومیکرون سے نمٹنے کے لیے ایکشن پلان کی تیاری میں شامل کیا جا سکتا ہے۔ملک میں لائی جانے والی ویکسینیشن کی تیز رفتاری کا ذکر کرتے ہوئے انہوں نے کہا کہ ہندوستان نے اس معاملے میں ترقی یافتہ ممالک سے مقابلہ کیا ہے اور ایک دن میں ڈھائی کروڑ ویکسین لگا کر اور اب تک پورے ملک میں 137 کروڑ ویکسین لگا کر ایک ریکارڈ قائم کیا ہے۔ اب تک ملک کی 88 فیصد آبادی کو کورونا ویکسین کی پہلی اور 58 فیصد آبادی کو دوسری خوراک دی جا چکی ہے۔

Related Articles