سنجے دت کے بچوں کو فلم ’سنجو‘ کیوں پسند ہے؟

ممبئی،ستمبر,بالی ووڈ اداکار سنجے دت نے انکشاف کیا ہے کہ اْن کے بچوں کو فلم ’سنجو‘ بہت پسند ہے کیونکہ وہ کبھی اپنے دادا، دادی سے نہیں ملے اور فلم میں اْن کے کردار دیکھ کر خوش ہوتے ہیں۔میڈیا کی ایک رپورٹ کے مطابق سنجے دت نے اپنے حالیہ انٹرویو میں اپنے بچوں کے حوالے سے گفتگو کی اور بتایا کہ اْن کے بچوں کو فلم ’سنجو‘ کیوں پسند ہے۔سنجے دت نے کہا کہ ’میرے بچوں کی پسندیدہ فلم سنجو ہے! بدقسمتی سے، وہ اپنے دادا دادی سے نہیں ملے اور اس فلم کو دیکھ کر، وہ اْنہیں محسوس کرتے ہیں اور اْن سے متعلق مجھ سے کئی سوالات کرتے ہیں۔‘جب ان سے پوچھا گیا کہ ان کے تین بچوں میں کس کے اداکار بننے کا زیادہ امکان ہے تو سنجے دت نے کہا کہ ’میں صرف یہ چاہتا ہوں کہ میرے تینوں بچے خوش رہیں اور جو کچھ بھی کریں اس کے بارے میں پْرجوش رہیں۔‘ سنجے دت نے کہا کہ ’میں آج بھی اداکاری کر رہا ہوں کیونکہ میں جو کچھ کرتا ہوں اس سے مجھے واقعی محبت ہے اور میں ان کے لیے بھی یہی چاہتا ہوں جبکہ میرا بیٹا فٹبال زیادہ شوق سے کھیلتا ہے تو مجھے لگتا ہے کہ اْس کا رجحان فٹبال کی طرف ہے۔‘اداکار نے کہا کہ ’اس کے ساتھ ہی مجھے یہ بھی لگتا ہے کہ میرے بیٹے میں اداکار بننے کی تمام صلاحیتیں موجود ہیں، وہ مشاہدہ کرنے والا ہے، ذہین ہے، رقص سے محبت کرتا ہے اور اپنی مزاح سے لوگوں کو متاثر کرسکتا ہے۔‘اْنہوں نے اپنی بیٹی اقرا کے حوالے سے بتایا کہ ’وہ ناقابل یقین اور بہت خوبصورت مصوری کرتی ہے۔ یہ یقین کرنا مشکل ہے کہ وہ اتنی سی عْمر میں اتنی خوبصورت مصوری کیسے کرسکتی ہے۔‘خیال رہیکہ سنجے دت کی والدہ اور اداکارہ نرگس 1981 میں کینسرکے باعث انتقال کرگئی تھیں اور اس کے 3 دن بعد ہی سنجے دت کی پہلی فلم روکی‘ ریلیز ہوئی تھی۔دوسری جانب اداکار کے والد سنیل دت 25 مئی 2005 کو ممبئی میں اپنے گھر میں صبح کے وقت مردہ حالت میں پائے گئے تھے، جبکہ ڈاکٹروں کی جانب سے ان کی موت کی وجہ دل کا دورہ قرار دی گئی تھی۔