کرسمس کے لیے کشمیر کے پیپر ماشی کاریگر آرائشی اشیا اور تحائف تیار کرنے میں مصروف
سری نگر، وادی کشمیر کی صدیوں پرانی دستکاری پیپر ماشی کے کاریگر ان دنوں عیسائی برادری کے سب سے بڑے تہوار کرسمس کے لیے مختلف
اقسام اور ڈیزائنوں کی آرائشی اشیا اور تحائف تیار کرنے میں مصروف ہیں۔ کشمیر کے پیپر ماشی کاریگروں کو ہر سال کرسمس کے موقع پر مختلف یورپی اور مغربی ممالک سے پیپر ماشی کی مصنوعات تیار کرنے کے آرڈر ملتے ہیں، جو نہ صرف ان کے لیے آمدنی کا بڑا ذریعہ ثابت ہوتے ہیں بلکہ اس سے ان کے ہاتھوں کے ہنر کو یورپ اور مغرب میں پہچان بھی ملتی ہے۔ عموماً خریدار اپنے ڈیزائن بھیجتے ہیں اور نمونوں کی منظوری کے بعد کاریگر آرڈر کی تکمیل میں لگ جاتے ہیں۔ کاریگروں کا ماننا ہے کہ یورپی اور مغربی ممالک میں ان کے ہنر کو زیادہ عزت و قدر کی نگاہ سے دیکھا جاتا ہے اور انہی لوگوں کی وجہ سے یہ ہنر آج تک زندہ ہے۔جنوبی کشمیر کے ضلع اننت ناگ کے چھترگل سے تعلق رکھنے والے معروف پیپر ماشی کاریگر محمد یوسف نے بتایا کہ انہیں ہر سال کرسمس کے مقدس تہوار کے لیے مختلف مصنوعات تیار کرنے کے آرڈر ملتے ہیں۔ انہوں نے ہندوستھان سماچار سے بات کرتے ہوئے کہا: ’’ان دنوں ہم کرسمس کے مقدس تہوار کے لیے مختلف قسم کی چیزیں، جن میں ستارے، مختلف سائز کی گھنٹیاں، گیندیں اور کرسمس ٹری وغیرہ شامل ہیں، بنانے میں مصروف ہیں۔ یہاں کے پیپر ماشی کاریگروں کو یہ چیزیں لاکھوں کی تعداد میں بنانے کے آرڈر ملے ہیں۔‘‘محمد یوسف نے کہا کہ ہمیں ہر سال مختلف مغربی و یورپی ممالک سے ان چیزوں کے آرڈر ملتے ہیں۔ ان ملکوں میں پیپر ماشی کی چیزوں کو قدر کی نگاہ سے دیکھا جاتا ہے۔ انہوں نے دعویٰ کیا کہ پیپر ماشی کی دستکاری کے آج تک زندہ رہنے میں انگریزوں کا بڑا کردار ہے۔ ان کا کہنا تھا: ’’پیپر ماشی کو زندہ رکھنے میں انگریزوں کا بڑا کردار ہے۔ انگریز ہنر سے محبت کرتے ہیں۔ یہ لوگ اپنے پیاروں کو سونے یا چاندی کی چیزوں کے بجائے پیپر ماشی یا دوسری ہینڈ میڈ چیزیں تحفے میں دیتے ہیں، کیونکہ یہ مال و متاع کے بجائے خوبصورتی اور ہنر کو پسند کرتے ہیں۔‘‘
انہوں نے کہا: ’’یورپی و مغربی ملکوں میں نہ صرف کرسمس کے موقع پر پیپر ماشی کی چیزیں استعمال کی جاتی ہیں بلکہ لوگ اپنے گھروں کی زیبائش و آرائش بھی انہی سے کرنا پسند کرتے ہیں۔ جب ہم یہاں اپنے ملک یا بیرون ملک کے کسی حصے میں نمائش لگاتے ہیں تو کوئی انگریز سیاح ہمارے اسٹال سے کوئی نہ کوئی چیز خریدے بغیر واپس نہیں جاتا۔‘‘
امریکی مارکیٹ کے بارے میں ان کا کہنا تھا: ’’ٹرمپ کی جانب سے بھاری ٹیرف عائد کرنے کی وجہ سے امریکہ میں ان مصنوعات کی درآمد میں کمی آئی ہے، لیکن خوشی کی بات یہ ہے کہ یورپی ممالک سے اچھی تعداد میں آرڈر مل رہے ہیں۔‘‘ واضح رہے کہ امریکہ کی جانب سے ہندوستانی مصنوعات پر ٹیرف بڑھانے کے بعد وادی کے کئی برآمد کنندگان اور کاریگر امریکی آرڈرز میں کمی کی شکایت کرتے رہے ہیں۔
محمد یوسف گزشتہ چار دہائیوں سے نہ صرف خود اس پیشے سے وابستہ ہیں بلکہ اب تک تقریباً تین ہزار افراد، جن میں اکثریت لڑکیوں کی ہے، کو یہ ہنر سکھا چکے ہیں۔ انہوں نے کہا: ’’میں گزشتہ 40 برسوں سے اس پیشے سے وابستہ ہوں۔ میں نے یہ کام سری نگر کے مختلف علاقوں، جیسے حسن آباد، باغوان پورہ اور جڈی بل میں کہنہ مشق کاریگروں سے سیکھا۔ پھر میں نے سب سے پہلے اپنی اہلیہ کو یہ کام سکھایا اور ہم نے مل کر اب تک تقریباً 3 ہزار افراد، جن میں بیشتر لڑکیاں ہیں، کو یہ ہنر سکھایا ہے۔‘‘ان کا کہنا ہے کہ اس دستکاری میں خواتین کو زیادہ دلچسپی ہے، جس کی بنیادی وجہ یہ ہے کہ یہ کام گھر میں آرام سے بیٹھ کر کیا جا سکتا ہے۔ ان کا ماننا ہے کہ اس دستکاری سے زیادہ کمائی نہیں ہو سکتی، لیکن گھر چلانے کے لیے یہ کافی ہے۔انہوں نے نوجوانوں کو یہ کام سیکھنے کی تاکید کرتے ہوئے کہا: ’’تعلیم یافتہ نوجوانوں کو سرکاری یا نجی نوکریوں کی تلاش میں وقت ضائع کیے بغیر پیپر ماشی کا ہنر سیکھنا چاہیے۔ اس طرح وہ نہ صرف سماجی برائیوں سے دور رہ سکتے ہیں بلکہ اپنی روزی روٹی کا بندوبست بھی کر سکتے ہیں۔‘‘ ان کا کہنا ہے: ’’یہ ایک ایسا کام ہے جس میں گھر کے تمام افراد ہاتھ بٹا سکتے ہیں اور اچھی خاصی کمائی ہو سکتی ہے۔ آج کے نوجوان بہت ذہین ہیں، وہ اسے جلدی سیکھ لیتے ہیں۔ میری 11 سالہ بیٹی نے دیکھتے دیکھتے یہ ہنر سیکھ لیا۔‘‘محمد یوسف کا کہنا ہے کہ کشمیر میں عبادت گاہوں کو پیپر ماشی سے سجانے کا رجحان بڑھ رہا ہے۔ انہوں نے کہا: ’’کشمیر میں عبادت گاہوں کو بھی پیپر ماشی سے سجانے اور سنوارنے کا رجحان بڑھ رہا ہے، جو اس ہنر کے دوام کے لیے ایک خوش آئند پیش رفت ہے اور اس دستکاری سے وابستہ کاریگروں کے روزگار کے لیے بھی ھی بات ہے۔‘‘ان کا کہنا ہے کہ وادی میںزاروں افراد پیپر ماشی کی دستکاری سے وابستہ ہیں اور اپنی روزی روٹی کما رہے ہیں۔انہوں نے مرکزی حکومت او جموں و کشمیر حکومت کا کاریگروں کی حوصلہ افزائی کرنے پر شکریہ ادا کیا۔ انہوں نے کہا: ’’ہم مرکزی حکومت اور جموں و کشمیر حکومت کے مشکور ہیں، کیونکہ انہوں نے کاریگروں کی حوصلہ افزائی شروع کی ہے۔ ہمیں وقتاً فوقتاً نمائشوں میں بلایا جاتا ہے اور پیپر ماشی سیکھنے کے لیے نئے مراکز بھی قائم کیے جا رہے ہیں۔ اس کے علاوہ وقتاً فوقتاً کاریگروں کو مختلف انعامات سے نوازا جاتا ہے۔‘‘
پیپر ماشی کے فن کے بارے میں روایت ہے کہ یہ چودھویں صدی میں ایران سے آنے والے علما اور ہنرمندوں کے ذریعے کشمیر پہنچا۔ کاریگروں اور تاریخی کتابوں کے حوالے سے کہا جاتا ہے کہ اس کا تعلق صوفی بزرگ میر سید علی ہمدانی کی آمد سے ہے، جو اپنے ساتھ پیپر ماشی کے علاوہ شال بافی، قالین بافی، لکڑی پر نقاشی، نمدہ سازی اور گبہ سازی کے ماہر استاد بھی لائے اور مقامی لوگوں کو یہ ہنر سکھائے۔ کاریگروں کے مطابق آج بھی وادی کی کئی تاریخی زیارت گاہوں، خانقاہوں اور مساجد میں پیپر ماشی کا کام نظر آتا ہے، جن میں سری نگر کی خانقاہِ معلیٰ خاص طور پر قابل ذکر ہے۔
’پیپر ماشی‘ دراصل فرانسیسی اصطلاح ہے، جس کا مطلب ’چبایا ہوا کاغذ‘ ہے۔ اس کی مصنوعات کاغذ کے گودے (پیپر پلپ) سے بنائی جاتی ہیں، جس کے لیے عموماً پرنٹنگ پریس میں کاغذ کی کٹائی کے دوران نکلنے والی کترنیں یا اعلیٰ معیار کا کاغذ کئی دن تک پانی میں بھگویا جاتا ہے۔ اس کے بعد اسے کوٹ کر باریک گودا بنایا جاتا ہے اور اس میں ابلے ہوئے چاول کا پانی ملا کر اچھی طرح گوندھا جاتا ہے۔ پھر اس گودے کو سانچے پر لگا کر گلدان یا دوسری مطلوبہ شکل دی جاتی ہے، بالکل اسی طرح جیسے کمہار مٹی سے برتن ڈھالتا ہے۔ مصنوعات کی چکناہٹ دور کرنے اور سطح کو ہموار بنانے کے لیے ان پر چاک مٹی کا استعمال کیا جاتا ہے، اس کے بعد روغن چڑھایا جاتا ہے اور آخر میں برش سے باریک نقاشی کی جاتی ہے۔
کشمیر کے علاوہ بہار، مغربی بنگال اور راجستھان کے بعض خاندان بھی یہ دستکاری کرتے ہیں، جبکہ ایران، ازبکستان، جاپان، چین، افریقہ کے بعض علاقوں اور میکسیکو میں بھی یہ فن موجود ہے۔ تاہم کشمیری دستکاری اپنی نفاست، باریک کام اور دلکش ڈیزائنوں کے سبب دنیا بھر میں مشہور ہے اور اسی وجہ سے یورپی منڈیوں میں بھی اسے پسند کیا جاتا ہے۔
