کشتواڑ کے گھنے جنگلات میں دہشت گردوں کی تلاش لیے سرچ آپریشن جاری

جموں، ضلع کشتواڑ کے گھنے جنگلات میں دہشت گردوں کی تلاش کے لیے فوج، جموں و کشمیر پولیس اور ولیج ڈیفنس گارڈز (وی ڈی جیز) کی بڑے پیمانے پر مشترکہ تلاشی مہم جاری ہے۔ سیکورٹی فورسز جنگلات کے مختلف علاقوں میں مسلسل تلاشی کارروائیاں انجام دے رہی ہیں تاکہ دہشت گردوں کا سراغ لگا کر انہیں گرفتار کیا جا سکے۔مہم کی نگرانی ایس ایس پی کشتواڑ سنی گپتا کر رہے ہیں۔ اس دوران اپوزیشن لیڈر سنیل شرما اور رکن اسمبلی شگن پریہار نے جاں بحق ہونے والے دو اسپیشل پولیس آفیسرز (ایس پی اوز) کے اہل خانہ سے ملاقات کرکے تعزیت کا اظہار کیا اور ان کے ساتھ ہمدردی و یکجہتی کا اظہار کیا۔
انہوں نے متاثرہ خاندانوں کو یقین دلایا کہ واقعے کی اعلیٰ سطحی تحقیقات کرائی جائیں گی اور نئی بھرتیوں کے حوالے سے بھی اقدامات کیے جائیں گے۔بتا دیں کہ بدھ کی سہ پہر ضلع کشتواڑ کے دچھن کیار میں تعینات جموں و کشمیر پولیس کے دو ایس پی اوز لاپتہ ہوئے تھے اور اگلے روز اُن کی گولیوں سے چھلنی لاشیں ملی تھیں۔ دونوں پولیس اہلکاروں کی ہلاکت پر پولیس نے کوئی بیان جاری نہیں کیا ہے ۔تاہم سیاسی لیڈران نے ان ہلاکتوں کے پیچھے دہشت گردی کا حوالہ دیا تھا