انوپم کھیر کی رابرٹ ڈی نیرو سے ملاقات ‘اس لیجنڈ سے ملنا ہمیشہ خوشی کا باعث ہے
یویارک، بالی ووڈ کے معروف اداکار انوپم کھیر نے اپنے ڈرامے ‘جانے پہچانے انجانے کے امریکہ اور کینیڈا کے جاری دورے کے دوران ہالی ووڈ کے معروف اداکار رابرٹ ڈی نیرو سے ملاقات کی اور ان کے ساتھ ظہرانے کی تصاویر اور ویڈیوز سوشل میڈیا پر شیئر کیں۔
انوپم کھیر نے رابرٹ
ڈی نیرو کو اپنا انتہائی عزیز دوست اور دنیا کے بہترین اداکاروں میں سے ایک قرار دیتے ہوئے انسٹاگرام اور ایکس پر تصاویر اور ویڈیوز کا ایک سلسلہ شیئر کیا۔ آسکر ایوارڈ یافتہ اداکار ڈی نیرو نے انہیں اپنے گھر پر ظہرانے کے لیے مدعو بھی کیا۔
انہوں نے لکھا، ‘مسٹر رابرٹ ڈی نیرو سے ملاقات! میں امریکہ آؤں اور اپنے سب سے عزیز دوست اور دنیا کے بہترین اداکار مسٹر رابرٹ ڈی نیرو سے نہ ملوں، یہ کیسے ممکن ہے؟ اس لیجنڈ سے ملنا ہمیشہ خوشی کا باعث ہوتا ہے اور ایک بار پھر امریکہ اور کینیڈا میں اپنے ڈرامے ‘جانے پہچانے انجانے کے ساتھ میرے سفر کی خاص یادوں میں سے ایک ہے
اداکار نے مزید کہا، عزیز مسٹر ڈی نیرو، مجھے اپنے گھر مدعو کرنے، لذیذ ظہرانے اور اپنی محبت و گرمجوشی کے لیے شکریہ۔ ہماری گفتگو اور آپ کا اپنے قیمتی وقت میں سے وقت نکالنا میرے لیے بہت اہم ہے۔ جب بھی ہماری ملاقات ہوتی ہے، میرے اندر موجود مداح بھی اتنا ہی پرجوش ہوتا ہے جتنا دوست۔
انوپم کھیر نے ڈی نیرو کی صرف سنیما کے لیے ان کی غیر معمولی خدمات ہی نہیں بلکہ ان کی گرمجوشی، عاجزی اور فیاضی کی بھی تعریف کی۔ انہوں نے ڈی نیرو اور ان کے اہل خانہ کا وقت دینے اور میزبانی کرنے پر شکریہ ادا کرتے ہوئے کہا کہ آسکر یافتہ اداکار کو اپنا دوست کہنے پر وہ خود کو واقعی خوش قسمت سمجھتے ہیں۔انہوں نے لکھا،ایک اداکار اور ایک انسان کی حیثیت سے میرے دل میں آپ کے لیے بے حد احترام ہے۔ میں خود کو واقعی خوش قسمت سمجھتا ہوں کہ آپ کو اپنا دوست کہہ سکتا ہوں۔ آپ، ٹفنی اور آپ کے پورے خاندان کے لیے میری محبت اور تشکر۔ ایک اور خوبصورت یاد دینے کے لیے شکریہ، جسے میں اپنے ساتھ گھر لے جاؤں گا۔ خدا آپ کو ہمیشہ سلامت رکھے۔انہوں نے اپنے پیغام کے اختتام پر لکھا، سب سے اہم بات-ٹوپی کے لیے شکریہ۔ آپ کا یہ محبت بھرا تحفہ میرے لیے بہت معنی رکھتا ہے!
ہندی اسٹیج ڈرامہ ‘جانے پہچانے انجان انوپم کھیر اسٹوڈیو کی پیشکش ہے، جس میں انوپم کھیر کے ساتھ اداکارہ سوروپ سمپت بھی شامل ہیں۔ ڈرامے کی موسیقی گلوکار انو ملک نے ترتیب دی ہے، جو پہلی بار کسی اسٹیج پروڈکشن کے لیے موسیقی ترتیب دے رہے ہیں۔
