ریاست کی برآمدات دو لاکھ کروڑ سے تجاوز: یوگی آدتیہ ناتھ

لکھنو، اترپردیش کے ضلع بھدوہی پہنچنے سے قبل اتوار کی صبح وزیر اعلیٰ یوگی آدتیہ ناتھ نے سوشل میڈیا پلیٹ فارم ’ایکس‘ پر پوسٹ کرتے ہوئے کہا کہ ایشیا کی سب سے بڑی بین الاقوامی دستی قالین تجارتی نمائش ’انڈیا کارپٹ ایکسپو‘ کے گولڈن جوبلی ایڈیشن کا آج آغاز کر کے قالین کی صنعت کے برآمد کنندگان، فروخت کنندگان اور صنعت کاروں سے بات چیت کروں گا۔

وزیر اعلیٰ یوگی نے کہا کہ پہلے بھدوہی کا ہنر اپنے راستے تلاش کرتا تھا، آج حکومت اس کے لیے ترقی، مارکیٹ اور مواقع کے نئے دروازے کھول رہی ہے۔ ریاست کی برآمدات گزشتہ 10 برسوں میں تقریباً 2.27 گنا بڑھ کر آج دو لاکھ کروڑ سے تجاوز کر چکی ہیں اور اترپردیش ملک کی پانچویں سب سے بڑی برآمد کنندہ ریاست بن چکا ہے۔ برآمدات میں بھدوہی کے قالین کا بڑا حصہ ہے۔
وزیر اعلیٰ یوگی نے کہا کہ جن ہاتھوں نے اپنے ہنر کے ذریعے بھدوہی کے قالینوں کو دنیا بھر میں پہنچایا، سال 2017 سے قبل وہی ہاتھ بنیادی سہولیات اور مواقع کے منتظر رہے۔ آج ڈبل انجن حکومت میں وہی ہنر ترقی اور عالمی منڈی، دونوں سے جڑ رہا ہے۔ ہاتھ سے بنے بھدوہی کے قالینوں کی مانگ آج پوری دنیا میں سب سے زیادہ ہے، جو عالمی سطح پر اتر پردیش کے ہنر کا لوہا منوا رہی ہے۔ انہوں نے کہا کہ اس موقع پر بھدوہی، اورائی اور گیان پور اسمبلی حلقوں کو 1340 کروڑ سے زائد کے 112 ترقیاتی منصوبوں کا تحفہ ملے گا اور مختلف اسکیموں کے مستفیدین کو فوائد بہم پہنچائے جائیں گے۔
وزیر اعلیٰ یوگی نے کہا کہ کاریگر کے ہاتھ کو وقار، کاروبار کو وسعت، نوجوانوں کو روزگار اور بھدوہی کو خوشحالی، یہی نئے اترپردیش میں وراثت اور ترقی کے حسین امتزاج کی نئی پہچان ہے۔ واضح رہے کہ وزیر اعلیٰ یوگی آدتیہ ناتھ اتوار کو بھدوہی کے دورے پر رہیں گے۔