کانپور دیہات:بس پلٹنے سے 12مسافر زخمی

کانپور دیہات:اپریل۔ اترپردیش کے ضلع کانپور دیہات کے سکندرا علاقے میں پیر کی صبح ایک پرائیویٹ بس پلٹنے سے 12مسافر زخمی ہوگئے جن میں شدید طور سے زخمی تین مسافروں کا علاج ضلع اسپتال میں چل رہا ہے۔پولیس ذرائع نے بتایا کہ پرائیویٹ ٹورسٹ شتابدی بس راجستھان سے چل کر کانپور جارہی تھی کہ نیشنل ہائی وے۔2 پر بس کا ٹائر پھٹ گیا اور بس بے قابو ہوکر پلٹ گئی۔ بس کے پلٹتے ہی بس میں سوار مسافروں میں چیخ و پکار سن کر آس پاس کے مقامی افراد دوڑے اور مسافروں کو نکالنے کی کوشش کی۔ مقامی افراد کی اطلاع پر موقع پر پہنچی پولیس نے فورا مقامی افراد کی مدد سے زخمیوں کو سی ایچ سی سکندرا میں داخل کرایا گیا ہے۔ جہاں علاج کے بعد تین زخمیوں کو ضلع اسپتال ریفر کردیا گیا ہے۔ایس پی بی بی جی ٹی ایس مورتی نے بتایا کہ بس بے قابو ہوکر پلٹ گئی تھی جس میں تین مسافر شدید طور سے زخمی ہوئے ہیں۔ جنہیں ضلع اسپتال میں داخل کرایا گیا ہے۔ دیگر مسافروں کو معمولی چوٹیں آئی ہیں۔بس پلٹنے کی وجوہات کا پتہ لگایا جارہا ہے۔