سعودی کلب سے متعلق خبریں بے بنیاد

بئونس آئرس،مارچ۔سعودی الہلال فٹ بال ٹیم کی جانب سے بین الاقوامی سٹار لیونل میسی کو دی گئی پرکشش پیشکش کے بارے میں حال ہی میں گردش کرنے والی قیاس آرائیوں کے بعد ان کے والد اور بزنس مینیجر جارج نے اپنی خاموشی توڑ دی۔انہوں نے آج ہفتہ کو اپنے انسٹاگرام اکاؤنٹ پر سٹوری فیچر پر ایک مختصر تبصرہ میں کہا کہ الہلال کے لیے 600 ملین یورو کی رقم ادا کرنے کے ان کے مطالبے کے بارے میں جو کچھ بھی کہا گیا وہ غلط اور محض جھوٹی خبر ہے۔ انہوں نے اپنے انسٹاگرام اکاؤنٹ کے ذریعے میسی سے متعلق خبروں کا ایک گروپ بھی منسلک کرتے ہوئے تبصرہ کیا کہ ’’جھوٹی خبریں! کب تک جھوٹ بولتے رہیں گے؟ ثبوت کہاں ہیں؟جہاں تک پیرس کے کلب پیرس سینٹ جرمین سے ارجنٹائنی سٹار کی منتقلی کے متعلق خبر ہے تو جارج نے اس حوالے سے بھی کہا کہ یہ غلط ہے۔ انہوں نے میسی کے اپنی ٹیم پیرس سینٹ جرمین کے ساتھ ٹریننگ میں شرکت سے انکار کی اطلاع کی بھی تردید کردی۔ یہ افواہیں حال ہی میں گردش کر رہی تھیں کہ مشہور فٹ بال کھلاڑی اور پیرس کی ٹیم کی انتظامیہ کے درمیان مسائل تھے جس کی وجہ سے میسی جمعرات کی مشقوں میں حصہ نہیں لے رہے تھے۔واضح رہے بارسلونا کے لیجنڈ، جنہیں تاریخ کا عظیم ترین کھلاڑی سمجھا جاتا ہے، نے 2021 کے موسم گرما میں پیرس سینٹ جرمین میں ایک مفت منتقلی کے معاہدے میں شمولیت اختیار کی تھی۔ یہ اس وقت کیا گیا تھا جب بارسلونا سپینش لیگ کے قوانین کی وجہ سے اپنے معاہدے کی تجدید نہیں کر پا رہا تھا۔