آسٹریلیا کا لاہور ٹیسٹ میں کراچی کی ٹیم پر ہی بھروسہ

لاہور،مارچ۔آسٹریلوی ٹیسٹ ٹیم کے کپتان پیٹ کمنز کا کہنا ہے کہ سیریز کے آخری ٹیسٹ میں کراچی ٹیسٹ میچ کے ہی گیارہ کھلاڑی میچ کھیلیں گے، ہم دو فاسٹ بولروں اور دو اسپنرز کے ساتھ میدان میں اتریں گے، تیسرا پیسر کیمرون گرین ہوگا، مجھے اپنی الیون پر اعتماد ہے، ہم اب زیادہ چانسز مس کرنا افورڈ نہیں کر سکتے، ریورس سوئنگ کا کردار اہم ہو گا۔ اتوار کو ورچوئل پریس کانفرنس کرتے ہوئے پیٹ کمنز نے کہا کہ پچ پر گھاس نہیں ہے، میں زیادہ اس پچ کے بارے میں کچھ نہیں کہہ سکتا کہ یہ کتنی مختلف ہے۔ پیٹ کمنز کا کہنا تھا کہ کراچی میں ہمارے پاس جیتنے کا موقع تھا لیکن ہم اس موقع سے فائدہ نہ اٹھا سکے، ہمیں فیلڈنگ میں زیادہ غلطیاں نہیں کرنا ہونگی۔آسٹریلوی کپتان نے کہا کہ یہ بڑا میچ ہے، فاسٹ بولرز کے لئے موسم بہت گرم ہے، ان کنڈیشنز میں کھیلنے کا زیادہ تجربہ نہیں ہے۔ انہوں نے کہا کہ یہاں پی ایس ایل کے دوران زیادہ میچز ہوئے ہیں اس لئے پچز ایسی ہیں، بابر اعظم کراچی میں غیر معمولی اننگز کھیلے ،ہم نے ان کے لئے پلانز بنائے اب انہی پلانز پر کام کریں گے۔