بحرین پر ایرانی حملے سے خطے میں کشیدگی بڑھنے کا خدشہ، اردن کی مذمت
منامہہ۔ردن نے بحرین میں شہری تنصیب پر ایرانی حملے کی مذمت کرتے ہوئے اسے خودمختاری کی سنگین خلاف ورزی قرار دیا ہے۔ اردن کا کہنا
ہے کہ اس طرح کے حملے خطے میں کشیدگی کو خطرناک حد تک بڑھا سکتے ہیں، جبکہ ایران نے امریکی ایف 16 لڑاکا طیارے کو نشانہ بنانے کا دعویٰ کیا ہے۔
عرب میڈیا کے مطابق اردن کی وزارت خارجہ نے اپنے بیان میں کہا کہ بحرین میں شہری صنعتی تنصیب کو نشانہ بنانا اس کی خودمختاری، سلامتی اور علاقائی سالمیت کی کھلی خلاف ورزی ہے۔ وزارت نے اس حملے کو خطرناک اشتعال انگیزی قرار دیتے ہوئے کہا کہ یہ بین الاقوامی قوانین اور اقوام متحدہ کے چارٹر کی بھی خلاف ورزی ہے۔اردن نے بحرین کے ساتھ مکمل یکجہتی کا اظہار کرتے ہوئے کہا کہ وہ بحرین کی خودمختاری، سلامتی، قومی اثاثوں اور شہریوں و مقیم افراد کے تحفظ کے لیے کیے جانے والے تمام اقدامات کی حمایت کرتا ہے۔دوسری جانب ایرانی فوج نے دعویٰ کیا ہے کہ اس کے فضائی دفاعی نظام نے خلیج فارس میں پرواز کرنے والے امریکی ایف 16 لڑاکا طیارے کو میزائل سے نشانہ بنایا۔ ایرانی حکام کے مطابق میزائل طیارے کے قریب پھٹا، جس سے اسے نقصان پہنچا اور پائلٹ کو اپنا مشن ادھورا چھوڑ کر قریبی ہوائی اڈے پر ہنگامی لینڈنگ کرنا پڑی۔تاہم امریکی فوج نے ایرانی دعوے کی تردید کرتے ہوئے کہا ہے کہ ایران نے کسی امریکی ایف 16 طیارے کو نشانہ نہیں بنایا اور مشرق وسطیٰ میں تعینات تمام امریکی لڑاکا طیارے محفوظ ہیں۔ اس طرح اس واقعے کے حوالے سے ایران اور امریکہ کے بیانات میں تضاد پایا جاتا ہے۔ بحرین میں شہری تنصیب پر حملے اور امریکی لڑاکا طیارے کو نشانہ بنانے کے ایرانی دعوے نے خلیجی خطے میں پہلے سے جاری کشیدگی کو مزید بڑھا دیا ہے۔ اردن نے اس صورتحال پر تشویش ظاہر کرتے ہوئے واضح کیا ہے کہ بحرین پر حملے خطے کے امن و استحکام کے لیے خطرناک ثابت ہوسکتے ہیں۔علاقے میں مسلسل فوجی کارروائیوں، میزائل حملوں اور جوابی اقدامات کے باعث خلیجی ممالک میں سکیورٹی خدشات بڑھ رہے ہیں، جبکہ عالمی برادری کی جانب سے کشیدگی کم کرنے اور مزید تصادم سے بچنے کی کوششیں جاری ہیں۔




