مظفر نگر میں سڑک حادثے میں چار افراد کی ہلاکت پر وزیراعلیٰ یوگی آدتیہ ناتھ کا اظہار تعزیت
لکھنؤ
/مظفر نگر،)۔ اتر پردیش کے وزیر اعلی یوگی آدتیہ ناتھ نے پیر کی رات مظفر نگر میں ایک سڑک حادثے میں چار افراد کی موت پر غم کا اظہار کیا ہے۔ انہوں نے حکام کو موقع پر پہنچنے اور زخمیوں کو بہتر علاج فراہم کرنے کی ہدایت کی ہے۔
سینئر سپرنٹنڈنٹ آف پولیس سنجے کمار ورما کے مطابق پیر کی رات پورقاضی پولیس اسٹیشن کے علاقے میں لکسر ریاستی ہائی وے پر ڈمپر اور کار کی ٹکر ہوئی۔ ٹکر کا اثر اتنا شدید تھا کہ گاڑی میں سوار افراد بری طرح پھنس گئے۔ اطلاع ملتے ہی پولیس موقع پر پہنچ گئی اور تمام افراد کو اسپتال لے گئی، جہاں چار افراد دم توڑ چکے ہیں۔ جاں بحق ہونے والے کی شناخت ہری نگر محلے کے لوہے کے تاجر آدیش گوئل (45)، اس کی بہن نشا (35)، راکھی اور نشا کی بیٹی شردھا (14) کے طور پر ہوئی ہے۔
زخمی ہونے والوں میں آدیش کی ماں کسم دیوی، بیوی روبی اور راکھی کی بیٹی ویشنوی بھی شامل ہیں۔ کار میں کل سات افراد تھے، جو آدیش کے سسر رادھےشیام کی 75 ویں سالگرہ منانے کے بعد رات کو کار سے واپس آرہے تھے۔ پورقاضی-لکسر ریاستی شاہراہ پر بڑھی والا میں سولانی ندی کے پل کے قریب ڈمپر اور کار کی آمنے سامنے ٹکر ہوگئی۔ اس واقعے میں تین افراد ہلاک اور چار دیگر شدید زخمی ہو گئے۔ اطلاع ملنے پر پولیس موقع پر پہنچی اور ہائیڈرا کی مدد سے اسکورپیو میں پھنسے لوگوں کو باہر نکالا اور زخمیوں کو اسپتال پہنچایا۔
واقعے کی خبر ملتے ہی اے ایس پی دنیش کمار، سی او ارون کمار، تحصیلدار رادھے شیام شرما اور اسٹیشن انسپکٹر ستیندر کمار پولیس اور پی اے سی کے ساتھ گاؤں پہنچ گئے۔ حکام نے جائے وقوع کا معائنہ کیا اور راحت اور بچاؤ کی کارروائیوں کا جائزہ لیا۔ انہوں نے حکام کو زخمیوں کو بہتر طبی علاج فراہم کرنے کی بھی ہدایت کی۔ ڈمپر اور اس کے ڈرائیور کو حراست میں لے کر ضروری قانونی کارروائی کی جا رہی ہے۔
