لکھیم پور کھیری تشدد: ملزم آشیش مشرا کی ضمانت پر سماعت 19 جنوری تک ملتوی

لکھنو:جنوری ۔ اتر پردیش کے لکھیم پور کھیری میں کسانوں کو گاڑی سے روند کر ہلاک کرنے کے معاملہ میں سپریم کورٹ نے ملزم آشیش مشرا کی درخواست ضمانت پر سماعت 19 جنوری تک کے لئے ملتوی کر دی۔ رپورٹ کے مطابق شکایت کنندہ کے وکیل دشینت دوے کی طبیعت خراب ہونے کی وجہ سے ملتوی کی گئی ہے۔اس کے علاوہ اس معاملے میں مزید اہم معلومات بھی سامنے آئی ہیں۔ سپریم کورٹ نے یوپی حکومت سے پوچھا ہے کہ کیا واقعہ کے فوراً بعد 3 لوگوں کی موت کے ملزم کسان اب بھی حراست میں ہیں؟ خیال رہے کہ گزشتہ سماعت کے دوران سپریم کورٹ نے ملزم آشیش کی درخواست ضمانت منظور کرنے کا اشارہ دیا تھا۔عدالت عظمیٰ نے کہا تھا کہ ملزم ایک سال سے زیادہ عرصے سے جیل میں قید ہیں۔ سپریم کورٹ نے نچلی عدالت کے جج سے پوچھا تھا کہ کیس کی سماعت مکمل ہونے میں کتنا وقت لگ سکتا ہے؟ جج نے اپنی رپورٹ میں کہا ہے کہ اس میں 5 سال لگ سکتے ہیں۔وہیں، شکایت کنندہ کے وکیل دشینت دوے نے ضمانت کی مخالفت کی ہے۔ انہوں نے کہا کہ یہ ایک سنگین معاملہ ہے۔ درخواست گزار کے والد مرکزی وزیر ہیں۔ وہ پہلے ہی دھمکی دے رہے تھے کہ مظاہرین کسانوں کو سبق سکھائیں گے۔ بہت بااثر گھرانے سے تعلق رکھتے ہیں۔ اگر اییک سال جیل میں رہنا ضمانت کی بنیاد ہے تو قتل کے ہر کیس میں ایسا ہونا چاہیے۔